Alcover mipasidaan bahin sa “ghost drivers”

CEBU, Philippines — Tungod sa krisis karon sa lana diin daghang mga sector ang naapektahan ilabi na sa transportasyon, dunay mga programa ayuda ang nasudnon ug mga lokal nga gobiyerno para tabangan ang pinaka-apektadong sektor, usa ani ang mga habal-habal drivers nga nanginabuhi pinaagi sa pagpamasahero gamit ang ilang mga motorsiklo.

Apan dunay pasidaan si Cebu City Councilor Pastor “Jun” Alcover batok aning iyang gihulagway nga “ghost habal-habal drivers” nga gipanglista sa subsidy lists ug mipasidaan siya batok aning mga maniobra sa politika nga makapalawgaw na hinuon sa integridad sa P35 milyones nga ayuda sa siyudad para sa mga habal-habal drivers.

Sa interview kaniya sa The Freeman, igsuong pamantalaan sa Banat News kagahapon, si Alcover nibutyag nga naay bag-ong listahan sa mga giingong habal-habal drivers nga giapil karon, bisan pa man og naa nay gimentinar nga opisyal nga lista ang siyudad.

“Daghan naman gud kaayo ning gilista-lista diri ba nga mga habal-habal drivers kuno… mura nag napulitika ba,” matud niya.

Siya nidugang nga iyang nabantayan nga kasagaran aning mga bag-ong lista, nagagikan sa mga barangay nga kaalyado ni Mayor Nestor Archival ang mga kapitan.

Sumala pang Alcover angn official registry nga naestablisar kaniadtong tuig 2024 ubos sa Cebu City’s Motorcycle-for-Hire Ordinance, kinahanglang magpabiling maoy basihan para sa pagpanghatag sa ayuda.

“Una, tagaan gyud ug priority ang listahan gyud nga habal-habal driver sa City Hall kay naa man tay ordinansa ana,” sumala pang Alcover.

Ang maong ordinansa gipasar naghimo og framework para sa akreditasyon, rehistrasyon sa mga habal-habal drivers, pagkuha og identification cards, ug magsuot gyud pirme sa ilang vests para dali silang makit-an ug mailhan.

Ang maong ordinansa nagtinguha nga mabalanse ang public safety ug seguridad sa panginabuhian pinaagi sa habal-habal nga kaniadto gikonsiderar nga ilegal.

Base sa listahan sa tuig 2024, dunay kapin 8,000 ka habal-habal drivers ang Cebu City.

Matud pang Alcover dunay mga oportunistang mga tawo nga gustong hi-jackon ang subsidiya para sa mga drayber.

“Abi kay nay motor, habal-habal na dayon,” matud pa niya kinsa niingon nga kinahanglan nga kadto rang rehistradong drayber ang mo- qualify ug gusto niyang i-double check sa mga barangay kapitan ang mga pangalan sa listahan ug kompirmahon kun tinuod ba kini nga padayun silang namasahero kay ang uban nibalhin naman og laing panginabuhian.

Si Mayor Archival sa sayo pa niingon nga ini og maaprubahan ang SB1, apil sa mahatagan og ayuda gikan ani ang mga habal-habal drivers ug uban pang drayber sa mga pangpublikong mga pasaheroan sulod sa duha hangtud tulo ka semana.

Bag-ohay lang giaprubaan sa Konseho ang Supplemental Budget No. 1 (SB1) para sa 2026 niadtong Abril 28 nga moabot tanan og P800 milyones apil ani ang P35 milyones nga subsidiya para sa mga drayber.

Hinuon giklaro ni Archival nga dili kwarta ang ihatag nga ayuda kondili gasolina gamit ang fleet cards, nga maoy gusto sa Konseho aron ang ayuda makatabang gyud sa inadlaw adlaw nga pamasahero.

Matud pa sa mayor, gibanabanang 3,500 habal-habal drivers ang naa sa ilang listahan karon, apan gilalis kini ni Alcover kay matud niya ang official registry maoy husto ug komprehensibo.

Misaad si Alcover nga iyang babagan kung duna siyay makitang mga kwestyonableng lista atol sa distibusyon kay ang ordinansa matud pa maoy proteksyon sa siyudad batok sa mga “ghost beneficiaries.” — /IBM (BANAT NEWS)