Motor nipilit sa ga-park nga trak
CEBU, Philippines — Patay ang usa ka senior citizen dihang nabangga siya sa dump truck nga gi-park kilid sa national highway sa Barangay Tulic, Argao habagatang lungsod sa Sugbo niadtong Biyernes sa gabii, Mayo 1.
Ang namatay giila nga si Pedro Carillo Mamac, 60, taga Barangay Bogo sa maong lungsod. Ang dump truck gimaneho sa 35-anyos nga si Angelito Omayan Villarmea, taga Barangay Cantao-an, dakbayan sa Naga.
Sa inisyal nga imbestigasyon sa Argao Municipal Police Station, nahitabo ni alas 7 sa gabii samtang ang biktima gikan sa amihanan pauli sa ilang balay sa habagatan.Gikataho nga ngitngit ang four-lane nga dalan sa Barangay Tulic ug wala niya mabantayi ang nag-parking nga dump truck.
Gidala siya sa Isidro Kintanar Memorial Hospital apan gideklarar kini nga dead on arrival mga alas 7:30 sa gabii. Sa follow-up nga imbestigasyon sa kapolisan , ang dump truck nag-parking sa outer-most lane tungod kay na-flat ang usa ka ligid niini, Apan ang drayber nakalimot sa pagbutang og early warning device para unta mabantayan sa ubang motorista ug wa sab siya truckboy.
“Nakalimot siya og butang sa katung early warning device… Naka-hazard kuno siya, pero naa pud niingon na wala. “Need ko og witness pud na mo-testify na wala siya naka-hazard,” matud pang Police Master Sergeant Jorge Parantar Jr., imbestigador sa Argao Municipal Police Station sa pakighinabi sa Banat News.
Si Parantar niingon sab nga wala siya makakuha og driver's license sa biktima nga nagsuot lang og nutshell helmet imbes nga full-faced helmet.
Si Villarmea gibuhian alas 12 sa udto kagahapon, Mayo 2, human nakasabot ang 25-anyos nga anak sa biktima.
Aron dili na masubli pa ang maong insidente, gipahinumdoman ni Parantar ang mga motorista nga kun mag-inusara ug magkaaberya kinahanglang magbutang gyud og early warning devices. (BANAT NEWS)
- Latest
