10,000 tropa gi-deploy para sa ASEAN Summit

CEBU, Philippines —  Andam na ang Central Visayas sa seguridad ug kaluwasan sa umaabot nga 48th  ASEAN Leaders’ Summit 2026, human nga pormal nga gi-deploy ang kapin 10,000 ka law enforcement ug emergency personnel ug logistical resources atol sa usa ka send-off ceremony nga gipahigayon sa Liberty Shrine sa Barangay Mactan, Lapu-Lapu City niadtong Sabado sa buntag, Mayo 2. Gipangunahan ang maong seremonya ni Philippine National Police (PNP) Chief PGen. Jose Melencio Nartatez Jr., uban ni Police Regional Office 7 (PRO-7) Officer-in-Charge PBGen. Arnold Abad, ug Lapu-Lapu City Mayor Ma. Cynthia "Cindi" King-Chan. Mitambong usab ang mga opisyal sa ubang ahensya sa gobyerno sa rehiyon, lakip ang Philippine Coast Guard (PCG), Bureau of Fire Protection (BFP), Armed Forces of the Philippines (AFP), Department of Health (DOH), Office of Civil Defense (OCD), ingon man ang ubang opisyal sa lokal nga kagamhanan ug kapulisan.

Sa kinatibuk-ang personnel nga lakip sa Committee on Security, Peace and Order, and Emergency Preparedness and Response o Task Group Central Visayas alang sa ASEAN Summit, labing menos 5,226 niini gilangkuban sa mga lalaki ug babaye gikan sa PRO-7, Cebu Police Provincial Office, Cebu City Police Office, Mandaue City Police Office, ug Lapu-Lapu City Office. Dugang pwersa nga 732 ka sakop sa Presidential Security Command, 510 ka bombero gikan sa BFP, 250 gikan sa AFP, 200 ka personnel gikan sa OCD, 150 gikan sa PCG, ug 200 ka force multipliers.

Alang sa health ug emergency response, dili mominos sa 29 ka mga medical expert gikan sa DOH ug 20 ka responders gikan sa Disaster Risk and Reduction Management Office ang naka-standby, samtang 50 ka mga enforcer gikan sa Lapu-Lapu City Traffic Management Service ang motabang sa trapiko.

Dduna usab labing menos 2,850 ka mga logistical units ug mga mobility resources sama sa mga patrol cars, motorsiklo, fire trucks, ambulansya, ug uban pang kagamitan ang gi-deploy.

Sa iyang mensahe, si Nartatez miingon nga pinaagi sa pagtinabangay sa tanan mamahimong luwas ug malampuson ang summit.

Gidayeg sab niya ang mga Sugbuanon sa disiplina niini matag dunay dakong kalihokan sama sa malampusong tinuig nga selebrasyon sa Sinulog sa dakbayan sa Sugbo, nga gibansagan usab nga labing dakong kapistahan sa nasud nga adunay minilyon nga lokal ug langyaw nga nanambong, usa ka maayong timailhan nga "shockproof" na ang Sugbo sa pag-host og mga dagkong kalihukan.

“Nandyan sila… Pag-sinamasama mo ‘yan, it will be a wonderful, seamless, and a very successful of any activity, and this activity is an international activity,” matud ni Nartatez. Gipasalig niya nga ang hiniusang paningkamot sa seguridad sa nagkalain-laing ahensya sa gobyerno moresulta maayong kalamposan sa ASEAN Leaders' Summit karong tuiga.

Mipadayag usab og dakong pagsalig si Nartatez sa bag-ong gitudlo nga officer-in-charge sa PRO-7 sa pagpatunhay sa misyon karong tuiga.

Hinuon gihulagway niyang anad na si Abad sa mga dagkong kalihukan tungod sa iyang posisyon kaniadto sa Manila, diin gisaulog ug gidagsa usab sa minilyon ka mga deboto ang kapistahan sa Itom na Nazareno.Kabahin sa posibleng mga rally sa mga cause-oriented groups dungan sa ASEAN Summit, si Nartatez nipasalig nga ang PRO-7 maoy modumala niini pinaagi sa liderato ni Abad. “We are now ready to give the support… Rest assured that these are committed para di naman mahiya ang Lapu-Lapu [City] at ang Pilipinas. Pilipinas ang itataguyod natin dito,” matud pa sa PNP Chief.

Sa Mayo 4 hangtud Mayo 11 ipatuman sab ang gun ban, bugtong ang mga unipormado lang nga mga tropa sa gobiyerno ang makadala-dala og armas. (BANAT NEWS)