14-anyos na hit-and- run

CEBU, Philippines — Patay ang usa ka 14-anyos nga batang lalaki human na hit and run incident og modern public utility jeepney (MPUJ) ubos sa flyover sa Archbishop Reyes Avenue sa dakbayan sa Sugbo niadtong Huwebes sa kadlawon, Abril 30.

Wala hinganli sa Banat News ang menor de edad nga biktima nga taga Barangay Guadalupe, dakbayan sa Sugbo.

Samtang giila ang nadakpan nga drayber nga si Junel Cordenesa Oman, 28-anyos, residente sa Sitio Mahayahay, Barangay Apas, dakbayan sa Sugbo ug lumad nga taga Barangay Arpili, lungsod sa Balamban.

Base sa inisyal nga imbestigasyon sa Cebu City Police Office - Traffic Enforcement Unit (CCPO-TEU), nahitabo ang insidente alas 2:30 sa kaadlawon .

Ang MPUJ paingon sa IT Park samtang ang bata nga gikan nag-baskeball naglakaw padung na unta mamauli sa dihang napunggit ug naligsan sa MPUJ. Tungod sa impact sa pagkabangga nakaangkon og grabeng kadaot sa nagkadaiyang parte sa lawas ang biktima lakip na sa ulo, abaga, kamot ug hawak.

Gidala siya sa Cebu City Medical Center aron matambalan ug gibalhin sa Vicente Sotto Memorial Medical Center, diin namatay kini mga alas-6 sa gabii sa samang adlaw.

Misibat ang  drayber apan gigukod siya sa duha ka taxi. Gikatahong ni-surrender kini sa Mabolo Police Station.

Human madakpi ang drayber sa MPUJ gipaubos kini sa alcohol ug drug confirmatory tests, apan nag negatibo.

Kasong Reckless Imprudence Resulting in Homicide ang ipasaka batok kaniya.

Sa ekslusibong pakighinabi sa Banat News, ang inahan sa biktima nga giila lamang sa alyas nga "Cathy" niingon nga  ilaha gyung kasohan ang suspek.

Gusto usab niyang manubag ang operator ug ang konduktor niini nga parehong wala pa mailhi. Siya nipasangil nga ang konduktor maoy nisulsol sa drayber nga moikyas human nabanggaan iyang anak.

“Lagot kaayo ko sa drayber kay kusog kaayo og padagan and ni ana ang kining konduktor na ‘sibat ta’,” sigon sa maong interbyu gahapon (Mayo 1).

Matud ni Cathy nagkasabot ang ilang pamilya nga pormal nilang ipasaka ang kaso inig human og lubong sa iyang anak karong Mayo 10 dungan sa pagsaulog sa Mother's Day karong tuiga.

“Dili ko kadawat… Mangayo gyud ko og pasaylo nimo anak kay wala gyud ko katabang. Sige siya og fight nako,” sumala ni Cathy samtang nagdanguyngoy.

Sa wala pa mahitabo ang insidente, nananghid ang iyang anak kaniya nga makigduwa og basketball uban sa iyang mga higala sa Barangay Luz.

Iya kining giingnan nga sa balay sa iyang lola sa Barangay Lahug nalang kini mopauli.

Iyaha sab giawhag ang kagamhanan sa siyudad nga papun-an ang mga suga sa kilid sa mga dalan aron mas daling makit-an ang mga tawo diha sa kilid. — IBM BANAT NEWS