PUJ napunggit sa laing PUJ, 12 naangol

CEBU, Philippines — Di mominos 12 ka mga pasahero ang nangaangol human ang duha ka traditional public utility jeepneys (TPUJs) nga ilang gisakyan nagbanggaanay sa intersection road sa dalan D. Jakosalem ug V. Gullas sa dakbayan sa Sugbo kagahapon Biyernes sa buntag, Mayo 1.

Ang nalambigit nga mga de-pasaherong sakyanan mao ang 04L TPUJ nga gimaneho sa 45-anyos nga si Eliseo Pacaña Baculi, taga Sitio Cambitas, Barangay Babag 2, dakbayan sa Sugbo nga dunay upat ka pasahero.

Samtang, ang usa mao ang 62B TPUJ nga nagsakay sa 14 ka mga pasahero ug gimaniho sa 56-anyos nga si Florencio Aser Gabonada sa Sitio Camansilis, Baramgay Pung-ol Sibugay, dakbayan sa Sugbo.

Sa 18 ka mga pasahero, labing menos 12 niini ang gikatahong nakaangkon og samad ug buwag nga gidala sa Cebu City Medical Center ug sa usa ka pribadong tambalanan sa dakbayan.

Hangtud ning pagsulat sa balita, wala pa gibutyag sa mga otoridad ang pagkatawo sa mga naangol nga indibidwal.

Base sa inisyal nga imbestigasyon sa Cebu City Police Office - Traffic Enforcement Unit (CCPO-TEU) ug sa closed-circuit television (CCTV) footage sa maong dapit, ang panagbangga nahitabo mga alas 9:26 sa buntag.

Gikataho nga ang 04L jeep nagsubay sa dalan D. Jakosalem paingon sa direksyon sa University of Visayas, samtang ang 62B jeep nagsubay sa dalan V. Gullas paingon sa direksyon sa Colonade.

Apan, ang 04L nga jeep nagpadayon sa pag-abante bisan pa man nga pula ang signal sa traffic light, samtang ang 62B nga jeep nagpadayon sa pagtabok sa intersection atol sa yellow nga signal.

Sa pag-abot sa intersection, ang 62B jeep nasentro og bangga ang tuong  bahin sa 04L, hinungdan nga ang naulahi nalimbuwad sa wala nga bahin niini.

Tungod sa panagbangga nakaangkon og kadaot sa kalawasan ang mga pasahero sa duha ka mga sakyanan, samtang ang duha ka mga drayber wala ra maunsa.

Pipila sa mga pasahero sa 62B jeep nibutyag nga kalit nga nipaspas ang drayber ug nisuway sa beat sa red light dapit sa intersection.

Dugang pa, ang TEU nag-ingon nga ang duha ka mga drayber pulos sad-an ug may tulubagon sa nasangpit nga insidente tungod sa wala pag-obserbar sa pagkamabinantayon samtang nag-drayb.

Gidugang niini nga ang 62B matud pa nga adunay katapusang klaro nga higayon aron mapugngan unta ang pagbangga.

Sa pagkakaron, ang duha ka mga drayber gitanggong na sa custodial facility sa TEU, samtang nagpaabot sa gihimong dugang nga imbestigasyon aron mas matino ang gidak-on sa ilang mga tulubagon. Ang duha mag-atubang og kasong Reckless Imprudence Resulting in Multiple Physical Injuries and Damage to Properties. — IBM BANAT NEWS