Motor vs ambulansya, babaye patay

CEBU, Philippines — Patay ang usa ka babayeng angkas sa motor samtang ang naangol ang rider sa motor nga iyang gisakyan human sila nagkabanggaanay og ambulansya sa national highway sa Barangay Langtad, Argao, alas 11:10 sa buntag.

Giila ang namatay nga si Jovee Emia Lomocso, 29, taga Dalahikan, Samboan, Cebu, nga gideklarang dead on arrival sa ospital.  Samtang ang drayber sa motorsiklo nga si Karl Catubig, taga Barangay Colasi, Samboan, nakasinati og bali sa abaga ug padayon nga gitambalan.

Sumala sa inisyal nga imbestigasyon sa Argao Municipal Police Station, ang motorsiklo nga Kawasaki Rouser nagbyahe gikan sa north padulong south samtang ang ambulansya nga Nissan Urban sa lungsod sa Oslob, nga gimaneho ni Melchor Pacatang Bancal Jr., 55 , taga Barangay Daanlungsod, Oslob, nagpadulong usab sa lain nga direksyon.

Sa pag-abot sa kurbadang bahin sa kalsada ang  ambulansya nga giingong kusog ang dagan  nawad-an og kontrol ang drayber ug nitipas pasulod sa kasugat nga lane ug napunggit ang mga biktima.

Dali silang gidala sa Isidro Kintanar Memorial Hospital sa Barangay Bogo, Argao, apan si Lomocso gideklarang patay pag-abot sa ospital.

Ang ambulansya, nga adunay siyam ka pasahero, hapit malahus sa fishpond human sa insidente. Maayo nalang nga wala ra mangaunsa pero gidala gihapon sila sa

Talisay City District Hospital alang sa dugang eksaminasyon.

Ang drayber sa ambulansya gidala usab sa ospital alang sa pagpatambal ug dayon gidala sa estasyon sa pulis alang sa hustong disposisyon.

Padayon pa ang imbestigasyon sa kapulisan kabahin sa maong insidente. Ikaduha na ni nga aksidenteng naglambigit og ambulansiya ug motor karong tuiga. (BANAT NEWS)