CCENRO wa giimbitar nga mosusi sa Binaliw landfill

CEBU, Philippines — Gibutyag sa labaw sa Cebu City Environment and Natural Resources Office (CCENRO) nga si Edita Peros nga wala sila maapil sa giumol nga composite team alang sa imbestigasyon ug rehabilitasyon sa pasilidad sa Prime Integrated Waste Solutions Inc. human sa trahedya sa trash slide niadtong Enero 8, 2026.

Suma pa ni Peros, bisan pa nga ang CCENRO adunay papel sa city closure ug rehabilitation plan, lakip na ang regular monitoring, wala sila imbitara sa PrimeWaste ug Department of Environment and Natural Resources (DENR) aron mahimong kabahin sa maong grupo.

Ang CCENRO maoy gitugyanan sa pag-inspeksyon aron masuta ang mga posibleng paglapas sa PrimeWaste. Apan si Peros nagkanayon nga kanunay silang dili pasudlon sa pasilidad sa higayon nga himoon ang pag-monitor.

“Kasagaran gyud dili gyud mi kasulod, sa gawas ra mi. Mao nga drone lang gyud among magamit, pero sa operations sa sulod, dili gyud mi maka-access. Labi na sa last kay nag-rehabilitate daw, para sa among safety, dili daw mi pasudlon,” pasabot niya.

Bisan pa gani sa panahon sa insidente, matud ni Peros nga dili usab sila makasulod kung wala ang presensya sa City Administrator.

Gipamatud-an sab ni Konsehal Joel Garganera ang pamahayag ni Peros diin matud pa nga dili na katingalahan ang maong sitwasyon. Iyang gihisgutan nga sa composite meeting niadtong Pebrero 8 sa opisina ni Mayor Nestor Archival gituki niini ang nagkadaiyang interbensyon sa kagamhanan alang sa landfill.

Gipahibalo ni Garganera nga wala sila gipasulod ug niangkon sab ang mga representante sa DENR nga sila sab wala pasudla sa maong pasilidad. Alang kang Garganera, dili niya masabtan kung nganong bisan ang buhatan sa CCENRO gidid-an nga mahimong kabahin sa imbestigasyon nga usa kini ka ahensya sa lokal nga kagamhanan nga kinahanglan nga manginlabot kabahin sa mga kasikas sa kalikupan sa syudad.

Dugang pa, giangkon sab ni Peros nga wala sab siya’y kasayuran sa nahitabong ‘partial lifting’ sa cease-and-desist order batok sa pasilidad, diin ang pasilidad nagpadayon na sa operasyon sukad pa niadtong Abril 25 ug nagdawat na kini og mga basura gikan sa mga pribadong kompanya. 

Tungod niini, mihangyo si Peros sa PrimeWaste nga tugotan ang CCENRO nga makasulod sa pasilidad aron mahimo ang ilang trabaho sa pag-monitor. (BANAT NEWS)