Vendors supak sa privatization sa Carbon Market

CEBU, Philippines — Gikan sa labing karaan nga merkado publiko sa Sugbo, nitumaw ang bag-ong nasudnong kampanyia sa pormal nga paglusad sa Save Carbon Market Movement sa mga vendor ug alyado nga grupo sa niaging adlaw.

Ang grupo nisaad nga padayong pakigbatokan ang privatization sa Carbon Market ubos sa Joint Venture Agreement (JVA) tali sa Cebu City Government ug Megawide’s Cebu2World subsidiary.

Ang paglusad gisugdan sa usa ka solemne nga misa diha sa Basilica Minore del Santo Niño ug gisundan sa pagmartsa paingon sa Carbon Market.

Nag-una mao si Irwin Gok?ong, kanhi presidente sa Cebu Market Vendors Multipurpose Cooperative (CEMEVEDCO) kinsa nipasabot nganong namugna ang maong kalihokan.

“Ang Carbon, konektado man sa La Trinidad, Benguet kay ilang patatas ug carrots moabot man diri… konektado ta sa La Union ug Nueva Ecija tungod sa ilang bombay ug ahos ug bugas… konektado man ta sa Mindanao sa Malaybalay… Sa Bohol, sa Negros. So nakahuna?huna mi nga kaning mga lugara, among adtuon… mag?inform mi ug mohangyo nga mo?join sa panawagan nga ang Carbon ipabilin nga public… dili e?private”, padayag ni Gol-ong.

Nagsugod na ang grupo og signature campaigns ug community assemblies diin nakaabot na kini ngadto sa kabukiran aron ipasabot ang epekto sa privatization.

Ang multi-billion nga JVA nga gipirmahan niadtong 2021 naghatag og katungod sa Cebu2World sa pag-develop ug pag-operate sa Carbon Market sulod sa 50 ka tuig.

Ang proyekto naglakip sa Freedom Park, Compania Maritima area ug bag-ong multi-level nga mga building sa merkado nga gi-target nga makompleto sa ulahing bahin sa 2026.

Ang mga kritiko nipadayag nga ang deal peligro nga mabalhin ang 6,000 ka vendors ug maguba ang publiko nga kinaiya sa merkado samtang ang mga tigsuporta nipadayag nga mag-modernize sa mga pasilidad ug mapalambo ang turismo.

Ang Carbon Market naestablisar kini niadtong 1900s isip coal depot nga dugay na’ng gikonsidera nga Divisoria sa Sugbo.

Kini maoy sentro sa patigayon sa agrikultura nga nagdugtong sa Sugbo, Luzon ug Mindanao.

Ang lokal nga grupo sa mga vendor niapila sa Committee on Housing, Markets, and Livelihood sa pag-review sa JVA. (Gikan sa The Freeman/BDB) BANAT NEWS