Suspek sa rape namatay

CEBU, Philippines — Kapin sa usa ka buwan human sa iyang pagkasikop, gikatahong namatay sulod sa jail facility ang usa ka person deprived of liberty (PDL)—nga maoy suspek sa pagpanglugos sa 11-anyos nga batang babaye sa Barangay Kalunasan, dakbayan sa Sugbo—human giingong gikulata kini sa iyang mga kaubang piniriso kagahapon sa hapon, Abril 27.

Ang namatay nga PDL giila nga si Fernando Abapo Prajes, 37, o alyas "Andot, habal-habal driver nga nagpuyo sa nahisgutang barangay.

Una kining gikompirmar sa Cebu City Police Office (CCPO) base sa impormasyon nga gipadangat gikan sa mga personnel sa Bureau of Jail Management and Penology (BJMP) sa dakbayan.

Matud sa CCPO nga si Prajes gikatahong napalgang walay panimuot mga ala-una sa hapon ug daling gidala sa Cebu City Medical Center apan gideklarar kini nga dead on arrival.

Wala pa matino ang eksaktong hinungdan sa kamatayon ni Prajes, samtang naghulat pa sa opisyal nga medical findings sa nagpadayong autopsy.

Ang CCPO miingon nga wala pa silay nadawat nga pormal nga written communication gikan sa BJMP-7 kalabot sa maong insidente.

Bisan pa man, gipasalig sa kapolisan sa dakbayan nga adunay saktong koordinasyon sa mga hingtungdan nga ahensya aron mamintinar ang transparency sa pag-handle sa maong panghitabo.

Sa laing bahin, si Cebu City Councilor Pastor "Jun" Alcover Jr., nibutyag nga ang hinungdan sa kamatayon ni Prajes mao ang giingong pagpangulata sa iyang mga kaubang PDL.

“Akong nakuha gikan gyud sa prisohan—duna man usab tay contact didto—gikulata gyud kini pag-ayo. Gikulata kuno ni hangtod namatay,” sigon niya sa pakighinabi sa Banat News kagahapon.

Dugang pa ni Alcover nga iyang nasayran gikan sa pamilya ni Prajes nga nagsugod ang mga pagpangulata sa unang adlaw palang nga naabot siya sa prisohan.

Giingon sa konsehal nga gisultihan ni Prajes ang iyang mga paryente atol sa ilang pagbisita kaniya sa prisohan nga nakasinati siya og “initiation” isip pag-welcome niya gikan sa iyang mga kaubang piniriso.

 Tungod niini, si Alcover niingon nga nakahukom ang pamilya nga ipaubos og autopsy ang patay’ng lawas tungod kay nangita usab sila og hustisya.

Ghost employee?

Kahinumdoman nga si Alcover mitingog bahin sa kadudahang background ni Prajes, human nasayran nga usa kini ka "ghost employee" sa Cebu City Hall.

Ang konsehal nikompirmar gikan sa Human Resource Department Office sa Cebu City Hall nga si Prajes usa ka job order (JO) nga empleyado ubos sa Barangay Affairs Office (BAO) gikan sa Septiyembre hangtod sa Disyembre niadtong 2025.

Ang pasangil sa konsehal wala pa maprubahi hangtud karon.

Si Prajes nasikop sa mga operatiba sa Guadalupe Police Station 9 sa Pier 4, North Harbor, Zaragoza Terminal didto sa Manila sayo niadtong Marso 10, dihang misuway kini pag-ikyas human sa gikatahong pagpanglugos niya sa usa ka menor de edad nga babaye niadtong Marso 7 sa Barangay Kalunasan.

Ang Banat News nangayo og komento sa Cebu City Jail - Male Dormitory, apan wala pa kini nagpagawas og pamahayag hangtod sa pagsuwat niining balita. (BANAT NEWS)