Nuclear energy isip long-term power strategy

MANILA, Philippines —  Subling gituki ang kabahin sa nuclear energy sa nasud isip long-term power strategy, apan ang mga industry leaders ug stakeholders pabilin nga dunay managlahi nga opinyon kun angayan na ba kini nga ipatuman sa pagkakaron o sa umaabot.

Atol sa energy forum nga gi organisar sa The Freeman ug Banat News, ang Department of Energy Visayas (DOE) nikompirmar nga ang nuclear power kabahin na sa ilang clean energy roadmap, nga nag target sa dili mominus 1,100 ngadto sa 1,200 megawatts nga capacity sa tuig 2032 hangtud na sa 4,800 megawatts sa tuig 2050.

Si DOE Visayas Regional Director Renante Sevilla miingon nga ang nuclear integration mamahimong inanay nga mapatuman inubanan sa pagplano, site identification, ug public awareness efforts.

Dugang pa niya nga ang ahensya nag-organisar na og unom ka clusters nga mosuporta sa nuclear development, apil na ang information campaigns ug lahi usab alang sa pag-ila sa mga potential sites.

Gilakbitan usab sa paghisgut ang Bataan Nuclear Power Plant isip usa ka cautionary example.

Ang Bataan Nuclear Power Plant (BNPP) usa ka $2.2 billion, 620- megawatt facility nga nahimutang sa Morong. Nakompleto kini niadtong1984 apan wala maka operate gumikan sa safety concerns ug mga alegasyon kabahin sa corruption sa panahon ni President Ferdinand Marcos Sr.

Sa pribadong sector, si First Gen Corp. Vice President and Head of Strategy and Planning Jay Joel Soriano miingon nga posibleng mahimo na nga kinahanglan ang nuclear sa umaabot nga mga adlaw.

“We have been very focused on solar, wind… but at some point to meet demand, we will run out of land. We will run out of space,” suma pa ni Soriano.

Samtang ang president and CEO sa Shell Energy Philippines Bernd Krukenberg mipadangat sa mga kabalaka kabahin sa financial feasibility sa nuclear projects. Giklaro ni Krukenberg nga bisan og magamit na ang nuclear energy, dili gihapon kini makasulbad sa energy crisis sa nasud.

Ang Aboitiz Power Transition Business Group Regional COO Rhea Navarro mihatag usab og importansya sa koordinasyon tali sa gobyerno ug private stakeholders.

Si Philippine Chamber of Commerce regional president Felix Taguiam nisanong usab nga pulos adunay benepisyo ug risgo ang nuclear energy.

Iyang gidasig ang mga stakeholders nga magpabilin nga open-minded samtang giila usab ang mga safety concerns. (BANAT NEWS)