Pag-ayo sa 13 ka taytayan nga naguba sa linog gipaspasan

Pag-ayo sa mga taytayan sa northern Cebu nga naguba sa linog ang gipaspasan na karon sa Provincial Engineering Office ubos sa six-month contract period.

Suma ni provincial engineer Hector Jamora nga gihatagan og unang pagtagad sa Kapitolyo ang pag-ayo sa mga critical infrastructure human sa magnitude 6.9 earthquake nga niigo sa mga lungsod sa norte niadtong Septiyembre sa miaging tuig.

“Rehabilitation and reconstruction mao nay atong gi-focusan karon. There are 13 bridges, and ang contract ana nila kay for six months,” suma ni Jamora.

Ang nagpadayon nga trabaho maoy kabahin sa “Kumbati Cebu” rehabilitation drive, nga gihimo human sa assessments sa kadaut nga namugna sa kalamidad.

Segun sa record sa Kapitolyo walo ka taytayan nga mokantidad og P159.732 million ang padayon karon nga giayo.

Lakip sa dunay dako nga budget mao ang lungsod sa Borbon, nga nakadawat og P60.037 million alang sa pag-ayo sa tulo ka taytayan, ang Cabica, Cadaruhan ug Tagnucan.

Laing mga taytayan ang giayo mao ang Poblacion-Suba Bridge sa Daanbantayan nga mikantidad og P33.344 million.

Sa Bogo City, ang Guadalupe Bridge giayo na usab nga mikantidad og P20.006 million.

Dugang mga proyekto mao ang Tabunok Bridge sa Sogod (P18.011 million), Piyo Bridge sa Tabogon (P16.886 million), ug Lamintak Bridge sa Medellin (P11.448 million). (BANAT NEWS)