Nangawat pang pre-natal

CEBU, Philippines — Nadakpan ang 18-anyos nga mabdos human giingong nasakpang nangawat og mga beauty products sulod sa usa ka iladong mall sa Barangay Pahina Central, dakbayan sa Sugbo niadtong Huwebes sa hapon, Abril 23.

Ang suspek giilang si Ellouisa, unom ka buwang nagsabak ug residente sa Sitio Banawa, Barangay Guadalupe, dakbayan sa Sugbo.

Base sa inisyal nga imbestigasyon sa Carbon Police Station 5, nadakpan siya sa usa ka security guard nga nakaakto niya nga nangawat og pipila ka mga baligya sa grocery department sa maong mall.

Gikatahong gipanulod niini sa iyang itom nga body bag ang mga paninda ug nibiya sa maong lugar nga wala mobayad sa cashier.

Matud sa kapulisan nga mobalor sa P11,700 ang gibana-banang kantidad sa mga branded nga beauty products ang gikawat sa suspek, lakip ang 13 ka face powder, 12 ka skin tints, siyam ka foundation, siyam ka lama sa ngabil ug aping, lima ka oil control face powder, duha ka eyeshadow palettes, ug usa ka glow getter.

Ang suspek gidala sa security guard ngadto sa police station, samtang pormal usab nga nipasaka og reklamo batok kaniya ang customer service representative sa maong mall.

Dugang pa, gibutyag usab sa kapolisan nga ang mabdos nga suspek nagplano unta nga ibaligya ang mga kinawat nga butang para makakuwarta aron ibayad sa iyang pre-natal laboratory tests.- IBM BANAT NEWS