Korean Help Desk ipahiluna sa siyudad sa Lapu-Lapu

CEBU, Philippines — Nagkahiusa ang Department of the Interior and Local Government (DILG), Embassy of the Republic of Korea in the Philippines, ug Police Regional Office 7 (PRO-7) sa pagpalig-on sa kaluwasan sa mga turista sa dakbayan sa Lapu-Lapu pinaagi sa Korean Help Desk.

Niadtong Lunes, Abril 20, si DILG Secretary Juanito Victor "Jonvic" Remulla, ang Ambassador of the Republic of Korea to the Philippines nga si His Excellency Lee Sang-Hwa, ug si PRO-7 Acting Director Police Brigadier General Arnold Abad mibisita sa Korean Help Desk facility nga nahimutang sa Mactan Shrine.

Ang pagbisita gitumong aron pagpalig-on sa koordinasyon, diin gihatagan og unang pagtagad sa mga local government units ang seguridad sa mga opisyal sa law enforcement agencies, ingon man sa international community.

Sumala sa taho sa PRO-7, ang Korean Help Desk nagsilbi nga mahinungdanong inisyatiba nga makatabang sa pagsiguro nga ang lokal ug langyaw nga mga turista dili lamang mapanalipdan, apan madungog usab, matabangan, ug mahatagan og gahum sa ilang pagbisita sa Lapu-Lapu City—nga giila usab nga "historic resort city". Sa iyang mensahe, gipadayag ni Remulla ang kamahinungdanon sa hiniusang responsibilidad sa pagpatunhay sa kalinaw nga naglakip sa kalampusan sa Safe Cities Initiative nga gilusad sayo ning buwana.

Samtang, gidayeg usab ni Ambassador Lee ang mga paningkamot sa gobyerno sa Pilipinas sa mas gipalig-on nga pakigtambayayong alang sa kaluwasan sa publiko, nga matod pa nakatampo usab sa pagsalig sa mga mamumuhunan ug pagpalambo sa turismo.

Sa iyang bahin, si Lapu-Lapu City Police Office (LCPO) Director Police Colonel Agosto Daskeo nga nahinabi sa Banat News nagkanayon nga ang Korean Help Desk dako og papel sa pagpatunhay sa kahapsay ug pagsalig sa publiko sa mga langyaw nga turista nga mobisita sa dakbayan ilabi na sa mga Korean national. Dugang pa niya nga ang maong pasilidad mag-operate sa tibuok adlaw ug gabii ug gidumala sa duha ka unipormadong pulis gikan sa Tourist Police Unit sa LCPO sa matag 12 ka oras nga shift. (BANAT NEWS)