Upat nadakpan sa managlahing buybust

CEBU, Philippines — Duha ka lalaki ang nadakpan sa usa ka buy-bust operation nga gihimo sa Philippine National Police Drug Enforcement Group – Special Operations Unit 7 (PNP DEG-SOU7) sayo sa buntag sa Martes, nga miresulta sa pagkasakmit og gidudahang shabu nga nagkantidad og P374,000.

Giila ang mga nadakpan nga si Care Johnson Mapalo, alyas “CJ,” 34 anyos, residente sa Paknaan, Mandaue City, ug si Junrey Magbanua Dela Peña, alyas “Chokoy,” 46 anyos, residente sa Candolawan, Talisay City ug nagtrabaho isip security guard. Matud sa kapulisan, gibana-banang 55 gramo sa gidudahang shabu ang narekober gikan sa mga suspek atol sa operasyon. Dugang pa PNP DEG-SOU7 nga duha ka semana nilang gibantayan ang kalihokan sa mga suspek sa wala pa ipatuman ang buy-bust.  Nasuta usab nga gituohang makabaligya ang mga suspek og mga 50 gramos sa ilegal nga druga matag semana sagad sa Lungsod sa  Liloan, Cebu.

Nasayran usab nga si Mapalo adunay daang rekord pa niadtong 2009 sa dihang menor de edad pa siya. Samtang si Dela Peña nalambigit kaniadto sa kasong murder gikan 2007 hangtud 2016 apan naabswelto.

Ang duha ka suspek karon gipriso ug nag-atubang og kaso sa paglapas sa Section 5 ug Section 11 sa Republic Act 9165 o Comprehensive Dangerous Drugs Act of 2002.  Samtang  nasakmit sa otoridad ang gibanabana nga P748,000 nga kantidad sa gidudahang shabu ug nadakpan ang duha ka indibidwal sa buy-bust operation nga gihimo niadtong Abril 20, 2026, mga alas 4:15 sa hapon, sa Sto. Niño Street, Barangay Luz, Cebu City. Ang operasyon gilusad sa Philippine Drug Enforcement Agency Regional Office 7 (PDEA RO 7) Regional Special Enforcement Team kauban ang Cebu City Police Office Station 4, human sa impormasyon gikan sa confidential informant ug mga concerned citizens. Giila ni PDEA- 7 Regional Director Joel B. Plaza ang mga nadakpan nga si alias “Jegan,” 41, usa ka on-call construction painter ug residente sa Barangay Luz, ug ang iyang kauban nga si alias “Jerme,” 36,  ug residente sa Barangay Kasambagan, Cebu City. Nasakmit gikan kanila ang tulo ka pakete sa gidudahang shabu nga mokabat og mga 110 gramos, nga may estimated market value nga P748,000. Na-recover usab ang buy-bust money ug uban pang ebidensya.

Sumala sa PDEA, ang mga suspek gibantayan sulod sa tulo ka semana sa wala pa ipatuman ang operasyon. Sa maong surveillance, nasuta nga gituohang nag-dispose sila og mga 50 hangtod 60 gramos nga ilegal nga droga matag semana ug giingong nagpadagan usab og drug den sa maong lugar. Nasayran usab nga si alias “Jerme” nakakompleto na og facility-based drug rehabilitation niadtong Nobiyembre 2025.

Ang mga nakumpiskar nga ebidensya gidala na sa PDEA RO 7 laboratory para sa hustong eksaminasyon, samtang ang mga suspek karon naa sa kustodiya sa PDEA RO 7 detention facility sa Barangay Lahug, Cebu City.

Pasakaan sila og kaso sa paglapas sa Sections 5 (sale of dangerous drugs), 11 (possession of dangerous drugs), ug 26 (conspiracy), Article II sa Republic Act 9165 o Comprehensive Dangerous Drugs Act of 2002. IBM BANAT NEWS