Tighimo'g armas nadakpan
CEBU, Philippines — Usa ka 44-anyos nga lalaki ang nadakpan sayo sa buntag niadtong Abril 21, 2026, human giingong nasakpan siya sa aktong paghimo og armas sa usa ka operasyon sa kapulisan sa Purok 1, Barangay Masaba, usa ka mountain barangay sa Danao City.
Ang suspek giilang si Guillermo Juntilla Veliena, alyas “Boboy,” residente sa maong lugar. Sumala pa sa kapolisan sa Danao nakadawat sila og tawag gikan sa usa ka concerned citizen mga alas 1:20 sa kadlawon nga adunay giingong nagbuhat og armas sa maong lugar.
Giingon pa nga kasagaran trabahoon sa suspek ang mga armas gabii ng dako aron way makakita.
Sa pag-abot sa mga polis, nasakpan nila sa aktuwal nga ang suspek nga naghimo og armas sulod sa usa ka payag.
Giduol dayon siya ug gipangayoan og legal nga dokumento nga magtugot sa paghimo og armas, apan wala siya nakapresentar og bisan unsang permit, hinungdan kini gidakop mga alas 2:20 sa kadlawon.
Nasakmit usab sa lugar ang daghang piyesa sa armas, bala, ug mga gamit sa pagtrabaho, lakip ang mga wala pa nahuman nga .9mm pistol parts, revolver units, magazines, mga makina ug gamit sa metal fabrication nga giingong gamiton sa ilegal nga paghimo og armas.
Ang tanang nakumpiskar nga ebidensya gidala sa police station alang sa husto nga dokumentasyon ug pagproseso.
Ang suspek karon anaa sa kustodiya sa kapulisan ug mag-atubang og kaso sa paglapas sa Republic Act 10591 o Comprehensive Firearms and Ammunition Regulation Act.— IBM BANAT NEWS
- Latest
