Armadong nagsauy-saoy nadakpan

CEBU, Philippines — Usa ka 46-anyos nga lalaki ang nadakpan sa kapulisan sayo sa kadlawon sa Abril 20, 2026, human kini gireport nga nagdala og pusil didto sa Belgium St., Brgy., Suba.

Sumala sa report, alas 12:20 sa kaadlawon dihang usa ka concerned citizen ang mitawag sa Police Station 6 aron ipahibalo ang presensya sa usa ka tawo nga armado og pusil. Dali dayon miresponde ang mga pulis nga sila si Patrolman Edison Abad ug Patrolman Godfrey Lingcon ubos sa mando  ni PCPT Noah Labra Añana.

Pag-abot sa lugar ilang nasigpatan ang suspetsado nga wala makabantay sa pag-abot sa mga otoridad maong dali siyang nadakpan.

Nakuha gikan sa posisyon sa suspek ang usa ka .357 revolver nga adunay upat ka bala sulod sa cylinder ug dugang pa nga upat ka bala. Ang suspetsado giila nga si Wilson Actoy Armicen, residente sa Barangay Suba, Cebu City. Wala siya’y maipakitang legal nga dokumento nga nagtugot kaniya sa pagpanag-iya sa maong pusil.

Gibalhog siya karon sa Custodial Facility sa Police Station 6 ug mag-atubang og kasong kalapasan sa Republic Act 10591 o ang Comprehensive Firearms and Ammunition Regulation Act.  IBM BANAT NEWS