Probinsiya niduso sa digital dashboard system

CEBU, Philippines — Giduso sa kagamhanan sa Probinsiya sa Sugbo ang episyente ug transparent nga paghatud sa mga hinabang ug serbisyo publiko pinaagi sa digital dashboard system nga nagtumong sa pagpadali sa proseso ug pagpalambo sa monitoring.

Si Assistant Provincial Administrator Aldwin Empaces nagkanayon nga ang inisiyatibo kabahin sa mas lapad nga digital transformation effort, dili limitado sa Assistance to Individuals in Crisis Situation (AICS) program, apan naglangkub sa daghang frontline services sa Kapitolyo.

Ang dashboard nga giumol sa Provincial Planning and Development Office (PPDO), nagtugot sa tukmang panahon nga pag-monitor sa mga hangyo lakip ang mga concern sa imprastraktura, tabang pinansiyal, ug mga serbisyo sa barangay.

Gipasabot ni Empaces nga gi-prioritize ang rollout sa AICS gumikan sa gidaghanon sa mga hangyo nga nadawat ilabina alang sa medical ug burial assistance.

Ubos sa bag-ong sestema, ang oras sa pagproseso gikunhod ngadto sa 20 ka adlaw o menos sa usa ka buwan basta kompleto ang rekisitos ug ang mga departamento molihok sa gitakda nga timeline.

Ang mga departamento nga lakip sa proseso nga naglangkub sa Provincial Social Welfare and Development Office, accounting ug treasury ang nidestino og personnel nga responsable sa paghupot ug pagduso sa mga request.

Sayo pa, si Empaces nagkanayon nga ang kakuwang sa klarong sestema ug ang pag-assign og focal persons nakapadugay sa processing time diin ang ubang requests molanat ngadto sa tulo ka buwan.  Gitumbok sa probinsiya ang ka kuwang sa koordinasyon pinaagi sa pagpahigayon og trainings alang sa opisyales sa barangay ilabina sa documentation ug liquidation pagsiguro sa paspas nga proseso inig abot sa requests diha sa Kapitolyo.

Gawas sa AICS, ang sestema nag-cover usab sa infrastructure monitoring ug mga serbisyo sa barangay uban sa plano sa pagpalapad pa lakip ang digitalization sa bayad sa Real Property Tax sa buwan sa Hunyo.

 Ang sestema magpauswag usab kini sa transparency ug performance evaluation sa mga buhatan sa gobiyerno ilabina kalabot sa incentives ug bonuses.

Ang kagamhanan sa probinsiya nigahin kini og P250 milyones nga pundo alang sa AICS karong tuiga diin tubag kini sa kanhi reklamo sa kakuwang sa pundo bisan sa daghang demand sa assistance.

Giklaro ni Empaces nga ang maong lakang subay kini sa mga balod sa Commission on Audit (COA).  (Gikan sa The Freeman/BDB) BANAT NEWS