Mga kabalaka ni Osmeña sa SB1 gitahod ni Archival

CEBU, Philippines — Gitahod ni Cebu City Mayor Nestor Archival, Sr. ang mga gipadayag nga mga kabalaka ni Bise Mayor Tomas Osmeña kalabot sa Supplemental Budget 1 nga gipaupos og deliberasyon sa Committee on Budget and Finance niadtong Abril 16, 2026.

Ang bise mayor nagduda sa P981.9 milyones tungod kay adunay daghang kuwang nga mga detalye ug wala kini disiplina sa pag-andam ug pagpresentar sa maong budget.

Matud ni Archival nga  adunay klarong proseso sa paghimo sa usa ka supplemental budget ug dugay na kining gihisgotan sa sulod sa kapin usa ka buwan sugod pa sa mga meeting uban sa department heads.  Usa sa mga dakong isyu nga giatubang mao ang problema sa basura sa siyudad.

Gipasabot sa mayor nga nanginahanglan ang siyudad og mas dako nga pundo nga mokabat og kapin sa P500 milyones alang sa waste management tungod sa gilay-on sa dumpsite.

Gihisgotan ni Archival nga doble na karon ang bayranan sa paglabay og basura  itandi kaniadto nga sa balwarte lang sa siyudad maglabayan nga anaa lang sa Barangay Binaliw samtang karon ngadto na sa Lungsod sa Aloguinsan. Matud ni Archival nga importante kaayo ang alokasyon sa budget alang niini aron malikayan nga mahimong hugaw ang dakbayan.

Iyang gipahinumduman nga adunay mga reklamo gikan sa publiko sa temporaryong transfer station diha sa South Road Properties ug mas mosamot pa ang problema kong dili makolekta ang basura sa tibuok siyudad.

Gibutyag ni Archival nga nikonsulta usab siya sa city treasurer kung aduna ba’y igong pundo ang siyudad ug gipamatud-an nga adunay pa’y igong pundo.

Gikataho nga adunay mga proyekto gikan pa sa 2022 nga gilakip sa Local Development Fund (LDF) nga kinahanglan nga dungagan ang bayad hinungdan nga nidesisyon sila nga gamiton ang maong pundo alang sa mga prayoridad nga proyekto karong tuiga. Apil sa mga giila nga prayoridad mao ang pag-atubang sa pagsaka sa presyo sa gasolina nga nakaapekto sa sektor sa transportasyon diin tungod niini nagplano ang siyudad og P35 milyones nga subsidy alang sa mga drayber.  Lakip usab sa budget ang proyekto alang sa artisan wells aron masiguro nga adunay igo nga suplay sa tubig karong panahon sa huwaw.  BDB BANAT NEWS