Sidewalk vendors gitugtan, kahapsay sa agianan ipatuman

CEBU, Philippines — Gitugutan ni Cebu City Mayor Nestor Archival ang mga naninda sa sidewalk apan giklaro niini nga kinahanglan usab nga ipatuman ang kahapsay sa mga agianan sa publiko.

Personal nga gi-inspection ni Archival ang mga vendors niadtong miaging semana lakip na diha haduol sa North Bus Terminal ug Kaohsiung Street, ngadto na sa B. Rodriguez Street.

Iyang giklaro nga gidawat sa siyudad ang mga vendors apan kinahanglan sila nga dili makababag sa mga pedestrians ug magpabilin nga hinlo.  “Ato silang giingnan nga nanginabuhi man mo, okay ra ang siyudad. However, ibutang ninyo sa area where dili makasamok sa mga lumalabay sa sidewalk,” suma pa ni Archival.

Daghan na sa mga stalls ang nakatuman sa boundary lines, apan tinguha ni Archival nga dunay himoon nga adjustments aron masiguro nga luwas ang mga pedestrian sa pag-agi sa dalan.

Nasuta usab sa gihimong inspection sa mayor ang mga infrastructure hazards, lakip na ang mga nagsiwil nga concrete pedestals nga maoy hinungdan sa pagka pandol sa mga pedestians.

Gimando gilayon ni Archival ang pagtangtang sa maong mga nakababag sa sidewalks.

Dugang niini gimandu usab sa mayor ang pagbutang og mga streetlights atubangan sa APM Mall, nonot sa kabalaka sa mga vendors kabahin sa kangitngit sa lugar nga nakahatag og peligro sa mga commuters ug sa mga stall owners panahon sa kagabhion.

Ang maong lakang sa mayor gihangop usab sa mga vendors nga nagpasalamat nga gitugutan sila nga makatinda ubos sa tukma nga mga balaud.

Gipasalig usab sa mga vendors nga pabilin nga motuman ug mag mentinar sa kalimpyo ug kahapsay sa ilang pwesto. Gikan sa The Freeman/MEL BANAT NEWS