Di dayun pamultahon sa unang paglapas

CEBU, Philippines — Giklaro sa Cebu City Police Office (CCPO) nga ang padayon implimentasyon sa “Safe Cities Initiative” mao ni ang pagpatuman sa tanang city ordinances diha pampublikong lugar.

Dili sab dayun sikupon ang mga una pang higayon  nakalapas sa mga ordinansa o kadtong padung pa mobuhat og kalapasan sa ordinansa.

Matud pang CCPO officer in charge Police Colonel George Ylanan sa mga minor violations, warning-first system pa ang ilang himuon.

Pagklaro niya ni human sa kontrobersiyal nga viral video sa social media sa usa ka insidente sa Mandaluyong City nga naglambigit sa usa ka construction worker nga giingong gi-isyuhan og citation ticket samtang nagtrabaho og semento nga naghukas.

Si Ylanan miingon nga ang implimentasyon sa kampanya limitado ra sa pampublikong lugar sama sa dalan ug kalsada ug dili kini moabot sa pribadong panimalay, sama sa nahitabo sa Mandaluyong.

“Pasabot gyud ato nga ordinansa gyud, kana gyud ‘tong galakaw-lakaw ka sa public roads, main roads… “Actually naay city ordinance nga ang first offense nimo, warned ka pero ilista imong pangalan…” ni Ylanan pa.

Gikan Abril 7 hangtod Abril 15, 809 ka operasyon ang gihimo nga niresulta sa pagkasakop sa 6,656 ka tawong tungod sa paglapas sa lain-laing ordinansa, lakip ang public drinking, smoking, shirtless in public, curfew violations, ug traffic violations.

Miingon ang CCPO nga 1,657 lang  ani ang gipamulta samtang ang uban gi-warningan lang. Gibanabanang moabot sa P1.74 milyon ang total penalties ang makolekta sa siyudad kung kining tanan mabayran.

Si Ylanan miingon nga ang sistema makonsiderar nga progressive enforcement kay sa unang paglapas warning palang, ayha pa ang penalty kung makalapas pag-usab.

Ang mga menor de edad nga madakpan sa curfew violations ipasa sa DSWD ug barangay.

Si Mayor Nestor Archival nipasidaan sa mga polis nga kinahanglang makitawhanon ang pagpatuman sa maong inisyatiba, lakip ang paghatag og t-shirt sa sa mga naghukas sa pampublikong lugar imbes silotan dayun.

Ang Safe Cities Initiative  usa kini ka programa sa Departmenr of Interior and Local Government  subay sa Local Government Code of 1991 nga  nagmando sa  higpit nga disiplina ug pagsunod sa mga lokal nga ordinansa sa tanan. (BANAT NEWS)