Senior Citizen nga HVI nadakpan

CEBU, Philippines — Mokabat sa kapin P4 milyones nga balor sa gidudahang shabu ang nasakmit sa duha ka managlahing anti-drug operations sa Cebu City niadtong Abril 16 ug 17, nga miresulta sa pagkadakop sa tulo ka suspek, apil ang usa ka senior citizen nga giila og high-value individual (HVI). Sa operasyon kagahapong adlawa, Abril 17 sa Barangay Ermita, nadakpan ang 65-anyos nga biyuda nga si Ester Flores Sabando, nga giila sa kapolisan isip high-value individual.

Gidakop si Sabando mga alas 7:25 sa buntag atol sa buy-bust operation nga gipahigayon sa Philippine National Police Drug Enforcement Group Special Operations Unit 7 (PNP DEG SOU 7). Sumala pa sa kapolisan, si Sabando sakop sa Target Intelligence Packet (TIP) ug dugay nang gimonitor tungod sa iyang giingong kalambigitan sa ilegal nga droga. Narekober gikan kaniya ang duha ka heat-sealed plastic sachet sa gidudahang shabu, lakip ang usa ka sachet nga gibaligya sa poseur buyer, nga mitimbang og 55 gramos ug adunay kantidad nga P374,000. Nasakmit usab ang P15,000 buy-bust money, lakip ang usa ka marked P500 bill, ug usa ka sling bag nga gigamit sa pagbutang sa droga. Ang iyang giingong kauban nga si Patricia Baron Cañedo alyas “Patring” nagpabiling at-large.

Si Sabando nag-atubang karon og kasong paglapas sa Sections 5 ug 11 sa Article II sa Republic Act 9165 o Comprehensive Dangerous Drugs Act of 2002.

Ang mga operasyon gipahigayon uban sa koordinasyon sa nagkalain-laing ahensya lakip ang Cebu City Police Office Station 5, IMEG-7, RIU-7, RDEU/RSU-7 ug PDEA-7. Sa unang operasyon nga gihimo niadtong Abril 16 sa Sitio Plaza Goma, Barangay Sambag I, nadakpan ang duha ka suspek nga giila lamang sa alyas Raffy, 37, usa ka food vendor, ug alyas Harold, 28, janitor gikan sa Lamac, Consolacion, Cebu.

Pinangunahan sa Philippine Drug Enforcement Agency Regional Office 7 (PDEA-7) ug Cebu City Police Office Station 2 ang buy-bust operation nga miresulta sa pagkasakmit sa 550 gramos nga gidudahang shabu nga nagkantidad og P3.74 milyones. Nasakmit usab sa mga operatiba ang 21 ka pakete sa shabu, buy-bust money, upat ka cellphone, ug uban pang ebidensya.

Ang duha ka suspek anaa karon sa kustodiya sa PDEA-7 samtang gihulat ang resulta sa laboratory examination sa mga nakumpiskar nga droga. IBM BANAT NEWS