Drayber sa ambulansiya gikasohan

CEBU, Philippines — Gipasakaan og kaso ang ambulance driver nga nakabangga sa motorsiklong gisakyan og duha ka mga tinun-an nga niresulta sa kamatayon sa usa sa nahitabong aksidente sa ibabaw sa Archbishop Reyes flyover diha sa Barangay Luz, Cebu City sayo ning semanaha.

Ang drayber nga gikasohan mao si Kevin Ryan Legaspino Gesta  nga taga barangay Apas. Ang namatay sa maong aksidente mao si Braille Nichole Kwek, 18 anyos nga tinun-an sa University of San Carlos.

Naangol sab ang kauban niining estudyante nga si Juan Antonio Ladioray nga maoy nagmaneho sa motor.

Ang Traffic Enforcement Unit (TEU) maoy nipasaka sa kaso niadtong Abril 16 nga reckless imprudence resulting in serious physical injury ug reckless imprudence resulting in damage to property human nisang-at og reklamo ang pamilya sa classmate ni Kwek nga si Ladioray.

Ang drayber anaa na sa kustodiya sa TEU human napaubos og inquest proceedings.

Sumala sa Cebu City Police Office (CCPO) Director Police Colonel George Ylanan, wala pa ma-file ang laing kaso nga reckless imprudence resulting in homicide kay wala pa nakadesisyon ang pamilya ni Kwek kay paabuton pa ang amahan niini nga toa sa Dubai.

“Sa pagkakaron, gihuwat nato ang decision sa amahan sa biktima,..  pa ingon naman kuno. Pero na inquest na siya didto sa serious physical injury ug sa RIR. Sa serious physical injury ug damage to property,” matud ni Ylanan. Gipasabot sa kapolisan nga ang pagpasaka og homicide complaint nagkinahanglan sa presensya ug pirma sa pamilya sa biktima.

Base sa unang imbestigasyon, giingon nga ang ambulansya nag-counterflow sa flyover sa ug niresulta kini sa pagbangga niini sa motorsiklo sa mga biktima.

Gikumpirma usab nga si Kwek namatay tungod sa grabeng kadaot nga iyang naangkon sa impact. Negatibo sa ilegal nga droga ug alkohol ang drayber human sa mandatory testing human sa insidente.

Ang CCPO mipahimangno sa mas istriktong disiplina sa trapiko bisan sa mga emergency responders.

Ubos sa Article 365 sa Revised Penal Code, ang reckless imprudence nagpasabot nga kini ngab buhat nga wala tuyoa nga makadaot o makasakit sa uban apan tungod sa kakulang sa pag-amping o paglikay sa peligro moresulta og kadaot sa tawo o kabtangan.

Ang silot magdepende sa kabug-at sa resulta sa insidente, ilabi na kung niresulta ni sa kamatayon sa biktima. IBM BANAT NEWS