Haze nabatyagan sa Metro Cebu

CEBU, Philippines — Ang Environmental Management Bureau 7 (EMB 7) mipasidaan sa publiko kagahapon bahin sa naobserbahang smog sa kalangitan Abril 17 ug gipahimangnoan kadtong dunay mga balatian ilabi kadtong dunay problema sa baga nga mag-amping.

Nabantayan kagahapon nga daw madag-umon ang kalangitan bisan og walay senyales nga moulan sa Metro Cebu, matud pa sa Facebook post sa EMB-7 nga na-detect ang PM2.5 level nga lapas na sa Guideline Value kagahapon  Abril 17, 2026.

Samtang tuod nga ang ubang Air Quality Index Level sensors naka-detect og kasarangang levels  gikan 59-62, dunay mga lugar sa Metro Cebu ang nilapas sa AQI nga 101 nga gikonsiderar nga peligroso sa mga sensitibong mga tawo.

Ang Air Quality Index (AQI)  sa  mga lugar duol sa Talisay City Station gikonsiderar nga “Unhealthy for Sensitive Groups.”  Tungod ani, gitambagan sa EMB-7 ang publiko nga likayan ang pagpatungod aning mga dapita nga daw dunay mga abog sa kahanginan, kung dili malikayan mas maayong magsuot og N95 MASK  aron malikay sa makadaut nga epekto niini.

Sa laing bahin, gidugang sab sa EMB-7 nga kung ugaling nga mobuto man ang Mt. Kanlaon sa Negros Occidental magpabilin ang kalidad sa hanging mahanggab diha sa Brgy. Cabitoonan, Toledo City manukad og PM10 ug PM2.5 levels  sa Toledo Station nga pasok pa gihapon sa guideline values.  Gituohan nga ang nasinating haze o smog bunga kini sa nagpadayung pagbuga og aso ug abo sa bulkang Kanlaon o localized pollution.

Gitambagan ang mga residente ilabi na ang mga kabataan, mga senior citizens ug kadtong dunay mga sakit sa baga nga likayan ang pagpundo aning mga lugara ug mas maayong magsul-ob og mask. IBM BANAT NEWS