Scholarship sa mga tinun-an sa ACTIEF gibalibaran

CEBU, Philippines — Emosyonal ang mga tinun-an sa Asian College of Technology International Education Foundation (ACTIEF) sa Pit-os campus human nga gibalibaran sa konseho sa Dakbayan sa Sugbo ang paghatag unta og scholarship program alang sa tinun-an sa kolehiyo.

Pipila ka mga tinun-an ang nitambong sa regular session niadtong Martes diin imbes orientation sa scholarship nga ilang apilan ang ilang tambongan deliberasyon na hinuon sa scholarship program.

Base sa nahitabong botasyon sa konseho, walo ka konsehal ang wala nitugot sa pagpasar sa maong resolusyon ng gipangamahan ni Konsehal Alvin Arcilla nga nagtinguha sa paghatag og otoridad kang Mayor Nestor Archival, Sr. aron mopirma og memorandum of agreement (MOA) tali sa ACTIEF.

Tumong niini ang pagpalapad sa kahigayonan nga makatungha sa kolehiyo ang mga estudyante gikan sa mga bukirang barangay.

Nalatid sa MOA nga ang ACTIEF ilakip unta sa Cebu City College Scholarship Program diin ang kagamhanan maghatag og tabang pinansiyal nga P10,000 matag semester alang sa matag iskolar.

Ang mga estudyante gikan sa bukirang barangay makadawat og P10,000 matag tuig isip transport allowance.

Gikataho nga ang walo ka konsehal  nibalibad kini gumikan sa kabalaka kabahin sa legalidad ug proseso sa programa.

Ang Committee on Laws, Ordinances, and Styling nga gipangulohan ni Konsehal Mikel Rama nitumbok sa posibleng conflict of interest tungod kay ang ACTIEF giingong gipanag-iya sa pamilya ni Konsehal Jose Lorenzo Abellanosa.

Matud sa komitiba nga mahimong supak sa Local Government Code nga nagdumili sa transaksiyon nga adunay kalambigitan sa naglingkod nga opisyal.

Nakita usab sa komitiba nga adunay kakuwang sa dokumentasyon lakip na ang kawalay pormal nga konpirmasyon gikan sa Cebu City College Scholarship Program Committee nga ang eskwelahan accredited na sa wala pa giendorso ang resolusyon. Gani, kuwang usab sa certification gikan sa Professional Regulation Commission (PRC) nga nagpakita nga ang performance sa board exams labaw sa national average sulod sa niaging tulo ka tuig ingon man ang administratibong kakuwang sa mga dokumento nga gisumite.

Gihisgutan usab ang kahimtang sa mga estudyante diin adunay mga konsehal ang nabalaka sa probisyon nga nagtugot sa pag-hold sa transcript of records kong adunay wala mabayran nga balanse nga posibleng makaapekto sa umaabot sa mga iskolar.  (BANAT NEWS)