Street sweeper, anak gitulis nangaangol

CEBU, Philippines — Samdan ang usa ka 16-anyos nga bata, samtang naangol ang iyang 45-anyos nga inahan human sila giatake sila wa mailhing riding-in-tandem nga mga tuloisan diha sa Sitio Tugas, Barangay San Roque, dakbayan sa Talisay, Sugbo niadtong Sabado sa kaadlawon, Abril 11.

Sa inisyal nga imbestigasyon sa Talisay City Police Station, nahitabo ang insidente pasado alas 4:30 sa kaadlawon kagahapon dihang nag-uban ang inahan nga si alyas “Grace” ug iyang anak nga si alyas “Dodong.”

Ang inahan usa ka street sweeper sa barangay ug gikuyogan siya sa anak aron videohan para sa dokumentasyon sa iyang trabaho.Apan kalit lang nga naay naabot nga duha ka lalaking nagmotor ug ang angkas nanaog ug gisignit ang table sa bata apan wala niya kini nakuha. Pagkakita sa inahan sa gibuhat sa suspek gidagan niya ni og gibunalan og silhig tukog ang tulisan aron makadagan iyang anak, apan gigukod gihapon ni sa tulisan ug gikatahong gidunggab og mahait nga hinagiban ang bata.

Nakuha gyud niini ang tablet ug daling niikyas. Swerte nalang nga natapsingan ra ang tiyan sa bata. Napangos ang mga kamot sa inahan tungod sa pagkadagma. Ang manag-inahan nisumbong sa Talisay City Police Station.

Nakuha sa CCTV sa insidente ug naghimo na og backtracking operation sa kapulisan sa dakbayan aron mailhan ang mga tulisan. — /IBM (BANAT NEWS)