2 napasok sa trak patay

CEBU, Philippines — Patay ang duha ka babayeng angkas sa duha ka motor ug kritikal ang usa ka drayber niini human sila napasok pareho ilawom sa usa ka trailer truck nga nibangga usab sa gate sa usa ka balay sa Barangay Tingub, dakbayan sa Mandaue niadtong Sabado sa gabii, Abril 11.

Ang mga namatay giila nga sila si Adeline Mediana, 34, residente sa nahisgutang barangay ug Marilyn Cuambot, 37, taga Barangay Canduman, dakbayan sa Mandaue.Samtang kritikal ang live-in partner ni Mediana nga si Marvin Ocampo Dayuha, 38. Ang laing drayber nga naluwas giila nga si Larry Juan Bahita, 30, kapuyo sab ni Cuambot. Ang trailer truck gimaneho ni Teodie Punay Ycot, 36, taga Dalaguete.

Matud pa sa Mandaue City Police Office (MCPO), nahitabo ang insidente sa dalan B. Suico sa Barangay Tingub pasado alas 10:40 sa gabii niadtong gabhiuna, samtang nagbiyahe ang trailer truck paingon sa M. Ceniza Street.

Sa pagliko niini sa tuo sa tungasong dalan giingong nikagar ang brakes niini maong naatras ang trak apan napasok sa ilawom niini ang duha ka mga nagsunod nga motor nga gimaneho nilang Dayuha ug Ycot.

Naangol sila Dayuha, Mediana, ug Cuambot kinsa daling gidala sa Eversley Childs Sanitarium and General Hospital sa Barangay Jagobiao, dakbayan sa Mandaue. Gawas niini, naguba sab ang gate sa balay nga gipanag-iya ni Edgardo Mercado de Guzman nga naigo sab sa trak.

Pagkasunod adlaw niadtong Abril 12, ang tigpamaba sa MCPO nga si Police Lieutenant Colonel Mercy Villaro-Kantuna mikompirmar nga ang duha ka babayeng backriders namatay sa tambalanan.

Gibutyag usab niya nga si Dayuha gibalhin dayon sa Vicente Sotto Memorial Medical Center sa dakbayan sa Sugbo kay kritikal ang kahimtang niini.

Ang drayber sa trak nga negatibo sa alcohol test gitanggong sa prisohan sa Cabancalan Police Station 4 samtang nagpaabot pa sa pormal nga pagpasaka sa mga reklamo sa pamilya sa mga biktima. — /IBM (BANAT NEWS)