Ayuda sa senior citizen posibleng mabalik sa quarterly

CEBU, Philippines — Natubag na ang gipangayo sa mga senior citizen sa Dakbayan sa Sugbo nga ibalik ngadto sa quarterly ang paghatag sa ilang pinansiyal nga ayuda bisan og walay pirma ni Mayor Nestor Archival, Sr. kini gumikan sa usa ka ordinansanga nahimong balaod.

Si Konsehal Pastor Alcover, Jr. ang nangamahan sa pag-amendar ang niesplika pinaagi diha sa social media nga ang maong balaod napasa na ngadto buhatan sa mayor niadtong Marso 18, 2026.

Ubos sa Section 54 sa Akta Republika 7160 kun “Local Government Code of 1991” ang mayor adunay napulo ka adlaw sa pag-aproba ug pag-veto sa ordinansa. Ug kong ma-veto kinahanglang ibalik kini ngadto sa konseho sulod sa napulo gihapon ka adlaw nga adunay gipamahayag nga objections o pagsupak.

Ang konseho mahimong mo-override sa veto pinaagi sa two-third votes.

Apan kong ang mayor dili mohimo og aksiyon ma-approve kini gumikan sa kalapasan sa panahon.

“Wa niya pirmahi, pero kay naa man sa balaod, nga bisan dili nimo pirmihan mahimo na siya’g epektibo nga ordinansa’, padayag ni Alcover. Ang pagpublikar diha sa pamandalaan ang gi-required ubos sa Section 59 sa Akta Republika 7610 sa dili pa iimplementar ang balaod diin matud ni alcover nga lihokon nila kini niining semanaha.

“I-publish na nato, mao nay ikaduha nga himuon nato para maepektibo gyud ang balaod”, ni Alcover pa.

Human sa pagpublikar, maghuwat og 15 ka adlaw diin human niini ang nahisgutang ordinansa mahimo na kining ipatuman diin obligado niini ang mayor.

Dihang niasumer si Archival sa posisyon niini karon, ubos sa ordinansa gipatuman niini nga binuwan na ang paghatag og P1,000 nga pinansiyal nga ayuda ngadto sa mga senior citizen , dili quarterly lump sums apan ang binuwan nga schedule dili consistent nga nasunod.

Ang paghatag sa ayuda nabalda kini gumikan sa mga katalagman ug emerhensiya lakip niini ang bagyong Tino ug Binaliw trash slide.

Matud ni Archival nga ang programa mabalik lang kini ngadto kong ang ordinansa maamendahan kinsa si Alcover nigama dayon og lakang kalabot niini ug giuyonan sa mga sakop sa konseho.                Si Alcover nipadayag nga ang pag-amendar sa ordinansa giduso kini sa mga senior citizen gumikan kay nasuta nila nga ang binuwan nga pag-release sa ilang ayuda dili kini convenient ug impractical. — /BDB (BANAT NEWS)