Alcover wala makauyon sa comprehensive report sa HRDO

CEBU, Philippines — Wala makauyon si Konsehal Pastor “Jun” Alcover, Jr. sa gisumite nga comprehensive report gikan sa Human Resource Development Office (HRDO) mahitungod sa kahimtang sa pagpatuman sa Health Emergency Allowance (HEA) alang sa mga health workers sa Dakbayan sa Sugbo tungod kay matud giingong kuwang ang mga detalye nga iyang gipangayo.

Kahinumduman nga nangayo og katin-awan ang konsehal niadtong Marso 2026 gumikan kay niduol na sa iyang buhatan ang mga apektadong health workers nga wala pa makadawat sa ilang benepisyo.

Sayo pa, gipahinumduman ni Alcover ang konseho nga paspasan ang paghatag og benepisyo ug allowances sa health workers nga na-expose sa COVID-19 samtang nagtuman sa ilang katungdanan niadtong tuig 2021, 2022, ug 2023.

Ug mao na nangayo kini og detalyadong report sa HRDO sama sa gidaghanon sa health workers ug mga pangalan sa mga kwalipikadong benepisyaryo sa HEA sa siyudad lakip na sa mga pangalanan sa mga nakadawat na sa ilang HEA ug kantidad sa nadawat nga benepisyo ug ang gidaghanon sa mga wala pa nakadawat sa benepisyo.

Gawas niini, buot usab masayran ni Alcover ang kinatibuk-ang kantidad sa pundo sa HEA nga nadawat sa siyudad gikan sa nasudnong kagamhanan ug kong aduna pa bay nahibilin sa maong pundo.

Apan human sa usa ka buwan dismayado si Alcover sa tubag gikan sa HRDO diin wala kini mapapugong nga nipadayag diha sa iyang Facebook account.

“Way names gihatag kinsa ang nakadawat ug wa kadawat…. HINAY PA SA BAO ATONG CITY HALL!!”, padayag pa ni Alcover.

Apan sa comprehensive report nga gisumite sa konseho gipakita niini ang records nga anaa sa buhatan nga mao ang regular, casual ug coterminous nga anaa sa 701 niadtong tuig 2021; samtang 1,178 niadtong tuig 2022, ug 807 niadtong tuig 2023.

Ang elected anaa sa usa niadtong 2022, job orders anaa sa 1,073 niadtong 2021; 1,014 niadtong 2022, ug 934 niadtong 2023.

Giklaro sa HRDO nga ang maong numero gibase lang kini sa available payroll nga naproseso alang sa HEA disbursements.

Giklaro usab sa HRDO nga walay opisyal nga lista sa mga personnel eligible sa HEA diin kasagarang health workers nakadestino kini sa Cebu City Medical Center, CCMC sa Barangay Guba, ug City Health Department. — /BDB (BANAT NEWS)