Duha ka batan-on nakuhaag mga armas
CEBU, Philippines — Duha ka mga lalaki ang nasikop sa kapulisan human nakuhaan og mga ilegal nga armas ug gituohang shabu atol sa managlahing operasyon sa lungsod sa Compostela ug sa Dakbayan Lapu-Lapu.
Unang nasikop ang usa ka 21-anyos nga lalaki atol sa buy-bust operation nga gipahigayon sa mga operatiba sa Criminal Investigation and Detection Group niadtong alas 9:41 sa gabii Abril 10, sa Barangay Canamucan, lungsod sa Compostela.
Giila sa Compostela Municipal Police Station ang suspek nga si Chris Mark Porlas Tanjay, residente sa Barangay Poblacion sa naasoy nga lungsod. Gidakop siya tungod sa matud pa pagpamaligya og armas ngadto sa poseur-buyer sa kapolisan. Nakuha gikan sa iya ang usa ka .9mm submachine pistol, 10 ka mga bala, usa ka magazine, ug P13,500 nga marked money.
Kagahapon sa kaadlawon, Abril 11, nasikop sab ang laing 21-anyos nga e-bike driver human nakuhaan og loose firearm ug illegal nga drugas atol sa pagpatuman sa Oplan Bulabog sa Sitio New Lipata, Barangay Pusok, dakbayan sa Lapu-Lapu. Matud sa Lapu-Lapu City Police Office, ang suspek giila nga si Joavier Esmael Mamiscal o alyas "Eng-Eng" residente sa Sitio Kalubihan, Barangay Bankal sa nahisgutang dakbayan.
Nasakmit atol sa operasyon ang usa ka kalibre .22 nga revolver nga adunay sulod nga tulo ka bala ug upat ka plastic sachet nga dunay sulod nga gidudahang shabu nga nagkantidad og P816. Kasamtangang gitanggong sa kustodiya sa kapulisan ang duha ka mga dinakpan samtang nagpaabot sa tukmang kaso nga ipasaka batok kanila. Kasong kalapasan sa Republic Act 10591 ang ilang atubangon, samtang laing kasong Republic Act 9165 ang ipasaka batok kang Mamiscal. (BANAT NEWS)
- Latest















