Malacañang: sci sa DILG dili anti-poor

CEBU, Philippines —  Gidepensahan sa Malacañang ang Safer Cities Initiative sa Department of the Interior and Local Government (DILG) nga gihulagway sa uban nga anti-poor  kay matud pa ang pagpatuman sa hustong disiplina dili pwedeng isipong diskriminasyon batok sa mga kabus.

Sa  press briefing sa Palasyo, si Palace Press Officer Claire Castro miingon nga ang mga ordinansa sa nagkadaiyang lokalidad igo rang istriktong gipatuman pinaagi anang programaha.

Dugay na kining maong mga balaod ug ordinansa ug kini gipatuman nang daan apan karon mas gipangusgan lang ang implimentasyon.

Matud pa ni Castro, ang pagdisiplina sa mga kabatan-onan nga maglatagaw diha sa kadalanan bisan dis-oras na sa gabii walay laing tumong kondili para ni sa ilang kaluwasan ug proteksyon.

Dili kini angay tawgon nga anti-poor tungod kay para kini sa tanang Pilipino ug sa kaugmaon sa mga kabataan.

Gipahimangnoan hinuon sa Palasyo ang mga law enforcement agencies nga moimplimentar aning programaha nga siguraduhong legal ug husto ang ilang pagpatuman sa ilang otoridad.

Kung dunay mga kaso sa pag-abuso kinahanglan dayon kini nga i-report aron maprotektahan ang mga biktima ug mapanubag ang mga abusadong otoridad.

Ang reaksyon ni Castro iyaha ning tubag sa pagkwestyon ug pamasangil sa grupong Ang Samahan ng Progresibong Kabataan nga miingon nga ang ang Safer Cities Initiative  usa ka “anti-poor” ug “prone to abuse.”  Ilaha sab ning gikabalak-an nga gihimo aron mag profiling ug harassment batok sa kabatan-onan.

Kun mamatikdan sa mga posts sa social media, daghang mga kabataang nalambigit sa mga kagubot og krimen panahon sa lawom nga kagabhion. Dunay uban nila ang nangaangol ug duna say nangamatay.

Tungod aning mga posts, daghang mga netizens ang nisaway sa kasamtangang administrasyon ug gani gikumparar pa nila ang kaniadto administrasyong Duterte nga matud pa nila mas ‘disiplinado’ ang mga tawo ug menus ang krimen.

Apan karon nga nihimo og mga programa ug lakang ang gobiyerno para matubag ang ilang mga kabalaka, naa lang gihapoy mga nangreklamo diha sa social media.

Ang tumong sa Safer Cities Initiative mao ang pagpalig-onon sa seguridad sa publiko pinaagi sa dugang presensya sa pulis sa mga high-risk areas sama sa eskwelahan, transport hubs, ug commercial zones, ug istriktong pagpatuman sa mga ordinansa batok sa pag-inom inom sa publikong mga lugar, pataka og pangihi, panigarilyo,  indecent exposure, paglaruy-laroy, ug videoke human sa alas 10 sa gabii.

Sa unang adlaw sa pagpatuman niini sa Cebu City ug Cebu Province sa sayo ning semanaha, sobra 500 ka mga tawo ang nangadakpan ug ang kadaghanan ani mga menor de edad nga naglatagaw sa kadalanan bisan lapas na ang curfew.

Sa Metro Manila atol sa unang adlaw sa implimentasyon, 24,881 ka violators sa mga lokal nga ordinansa ang gisikop.