JO sa Mandaue makadawat og P5,000 nga gratuity pay

CEBU, Philippines — Giaprobahan sa konseho sa Dakbayan sa Mandaue sa ikatulo ug pinal nga pagbasa ang ordinansa nga naggahin og pundo alang sa gratuity pay sa job order (JO) personnel sa siyudad isip pag-ila sa ilang kakugi ug serbisyo.

Ubos sa DO No. 76-2026 nga gipangamahanan ni Konsehal Joel Seno nagtinguha kini sa pag-aproba sa Supplemental Budget No. 1 alang sa calendar year 2026 nga nikabat ngadto sa P197.71 milyones.

Tipik sa maong budget gitagana alang sa gratuity pay sa JO employees diin matag usa kanila ang makadawat og P5,000.

Gipasabot ni Seno nga ang maong kantidad gikan sa wala magamit nga 20 porsyento nga development fund alang sa 2025 ug gikan usab sa mga proyektong dili na maimplementar nga nikabat ngadto sa P197,715,908.06 diin nabalik kini sa general fund aron magahin sa supplemental budget.

Matud sa konsehal nga ang gratuity pay unta ipagawas sa Disyembre 2025 ug Enero 2026 apan nalangan tungod sa mga teknikal nga hinungdan.

Gipadayag ni Seno nga naghulat ang konseho sa implementing rules nga ulahi na nga niabot mao nga giapil na lang kini sa maong balaod.

Giingong adunay kakulang usab sa pundo alang sa pagpatuman sa gratuity pay apan ang siyudad nakapangita og paagi aron mahatag gihapon kini.

Sa laing bahin, apil usab sa maong kantidad ang alang sa dugang gasto sa basura ug emergency measures.

Si City Hall Office Aide Zissell Ann Vaflor, usa ka JO employee nagkanayon nga malipayon siya nga makadawat na sila sa ilang gratuity pay.

Iyang gipadayag nga dako kaayo og tabang ang ang maong gratuity pay ilabi na karon nga hapit na ang klase diin magamit niya kini sa school supplies sa iyang mga anak.

Gibutyag ni Vaflor nga wala na sila maglaom sa maong gratuity pay human nga wala kini mahatagan niadtong Disyembre. BDB BANAT NEWS