Duha gidakop tungod sa armas   

CEBU, Philippines — Duha ka mga lalaki ang nadakpan human nakuhaan og ilegal nga armas atol sa managlahing operasyon niadtong Miyerkules ug Huwebes ning semana.

Ang unang nasikop mao ang 37-anyos nga lalaki kinsa nasakpan sa akto nga namaligya og walay lisensya nga armas ngadto sa usa ka undercover nga pulis atol sa buy-bust operation nga gipahigayon sa Sitio Camansi, Barangay Pajo, dakbayan sa Lapu-Lapu niadtong hapon sa Abril 8.

Giila ang suspek nga si Paolo Amintao Guinal, residente sa Sitio Seaside sa samang barangay.  Nakuha gikan niya ang usa ka 5.56 caliber revolver nga walay serial number, lima ka mga  bala, ug marked buy-bust money.

Kagahapon, Abril 9, nadakpan usab ang 46-anyos nga si Oliver Geraldin Navarro nga nakuhaag usa ka armas ug usa ka gidudahang granada pinasikad sa search warrant sa iyang bala sa Sitio Cambitas, Barangay Babag, dakbayan sa Sugbo.

Ang suspek nga si Oliver Geraldin Navarro, residente sa nahisgutang lugar, nakuhaan og usa ka kalibre .45 nga pistola, uban ang magazine niini, mga bala, mga slug sa armas, ug usa ka granada.

Ang duha ka operasyon gihimo sa Criminal Investigation and Detection Group (CIDG) Mandaue City Field Unit subay sa pagpatuman sa Oplan Paglalansag Omega. (BANAT NEWS)