Abogado gipasanginlang nang-scam sikop
CEBU, Philippines — Usa ka abogado nga giingong nang-scam sa iyang mga kliyente nasikop sa kapolisan diha sa Barangay Canduman, Dakbayan sa Mandaue niadtong Martes sa hapon.
Giila ang suspetsado nga si Lail Abendan Rojo, aktibong sakop sa Integrated Bar of the Philippines (IBP) - Cebu Chapter ug kasamtangang nagpuyo sa dalan Tres de Abril, Barangay Labangon, Dakbayan sa Sugbo.
Ang suspetsado nasikop siya pinaagi sa joint operation nga gipangulohan sa Mandaue City Police Office (MCPO) pinasikad sa warrant of arrest nga giluwatan ni Regional Trial Court (RTC) Judge Marc Joseph Quirante sa Branch 88 sa Dakbayan sa Mandaue niadtong Nobiyembre 10 sa niaging tuig.
Si Rojo nag-atubang kini og kasong estafa ug girekomendar sa korte ang P20,000 nga piyansa alang sa temporaryong kagawasan sa suspetsado.
Si Rojo nakagawas kini gikan sa detention cell sa MCPO human nakabutang og piyansa. Si Rojo gipasanginlang namiktima sa iyang mga kliyente pinaagi sa pagpaningil og acceptance fee apan nagdumili sa pag-atiman sa kaso ug wala na magpakita.
Nasayran usab nga nadakpan ang suspetsado niadtong Agosto 11, 2022 tungod sa susamang kalapasan.
Ang Banat News nisuway og kuha og habig sa IBP-Cebu apan nagdumili kini paghatag og pamahayag.
Ang IBP-Cebu pinaagi sa mga kawani niini nga nagdumili sa pagpaila igo lang nikompirmar nga si Rojo sakop sa nahisgutang lokal nga organisasyon sa mga abogado.
Ug wala pa’y direktiba ang IBP-Cebu nga mopagawas og opisyal nga pamahayag kalabot sa pagkasikop sa ilang aktibong miyembro. — ( Banat News )
- Latest
