JOs anam nga nasweldohan
CEBU, Philippines — Inanay na nga nasweldohan ang gibana-bana 956 ka mga job order employees sa Dakbayan sa Sugbo nga wala pa makadawat sa ilang sweldo sulod sa hapit lima na ka buwan.
Si Konsehal Harold Kendrick Go sa sesyon niadtong Marso 2026 miingon nga Oktubre 2025 pa wala makadawat sa ilang sweldo ang mga JO.
Sa pagpakihinabi ngadto kang Henry Tomalabcad, pangulo sa Human Resource Development Office (HRDO) kini niingon nga maong nalangay kay dili kumpleto ang mga dokumento ug hinay sa pagproseso sa mga departamento.
Ang mga dokumento gilangkuban sa Birth certificate gikan sa Philippine Statistics Authority, NBI clearance, health certificates ug resulta sa drug test.
Giklaro ni Tomalabcad , tigprinta ra sila sa payroll. Ang kalangay nagagikan sa mga Administrative Officer o Payrollmaker sa kada departamento kay silay tigkwenta sa mga sweldo ug sila sab ang mo-encode niini ngadto sa sistema.
Ipasa ang payroll sa City Budget Office, Accounting Office, Office of the City Administrator, ug sa City Treasurer’s Office alang sa dugang nga proseso.
Niadtong miaging semana lang nadawat sa ubang departamento ang ilang gikahinamang sweldo ug mosunod na sab ang uban.
Sa habig mga wala pa nasweldohi miingon nga nagkautang-utang na sila tungod kay padayon sila nga nanarbaho bisag walay sweldo. Ang uban giprenda na ilang ATM. IBM BANAT NEWS
- Latest
