Security guard gidunggab sa laing gwardiya
CEBU, Philippines — Usa ka 43-anyos nga security guard ang nasamdan human kalit nga gidunggab sa usa kaubang security guard sa Cargo Area sa Mactan-Cebu International Airport (MCIA) niadtong Biyernes, Abril 3.
Base sa report sa Philippine National Police Aviation Security Group (PNP AVSEGROUP), ang biktima ug ang suspek, kansang mga pagkatawo wala gibutyag, pulos nadestino sa pasilidad.
Nasayran nga igo lang naglingkod ang biktima sa cargo releasing area dihang kalit kining giataki sa kaubang security guard nga way klarong rason.
Matod pa, ang maong insidente misangpot sa usa ka mubo nga away tali sa duha ka mga gwardiya hangtud nga nakaangkon og samad dinunggaban sa walang bukton ang biktima.
Samtang ang suspek daling misuway pag-ikyas human sa hitabo, apan nasikop dayon kini sa mga otoridad sa palibot.
Nadakpan siya sa mga nirespondeng pulis gikan sa PNP Aviation Security Group ug mga sakop sa MCIA Police Station (MCIAPS).
Ang samdan nga biktima daling gidala sa Lapu-Lapu City District Hospital aron matambalan.
Samtang ang suspek kustodiya ug gidala sa MCIAPS Investigation Section alang sa dokumentasyon ug tukmang disposasyon.
Giandam na usab sa mga awtoridad ang gikinahanglan nga dokomento sa pagpasaka og kaso. Gipasalig usab sa PNP AVSEGROUP sa publiko nga padayon ang ilang tinguha nga palig-onon ang mga lakang sa seguridad, pauswagon ang pagkamabinantayon, ug ipatigbabaw ang labing taas nga sukdanan sa kaandam, ilabi na sa panahon sa pagdagsa sa gidaghanon sa mga mobiyahe. (BANAT NEWS)
- Latest
