Sidecar vs delivery van, pito naangol

CEBU, Philippines — Pito ka tawo ang naangol human nahitabong panagbangga sa Kawasaki Baja motorcycle nga naay sidecar ug closed delivery van sa may National Highway, Barangay Candaguit, Lungsod sa Sibonga kagahapon sa buntag, Marso 31, 2026.

Ang sidecar gimaneho ni Patrick Heredia ug duna kini sakay nga unom ka mga pasahero nga sila si Genesa Himar, 22; Shanin Himar, 19, pulos taga Barangay Lutupan, Toledo City; Bianca Michaela Morala, 21, taga Lapu-Lapu City; Jocel Cabrera, 23, residente sa Barangay Labangon, Cebu City; usa ka 14-anyos nga batang babaye ug Britt Gemena, pulos molupyo sa Barangay Candaguit.

Samtang ang closed delivery van gimaneho ni Reynaldo Sarona Sardoncillo, 37, salesman ug residente sa Barangay Binlod, Lungsod sa Argao.

Base sa imbestigasyon sa Sibonga Municipal Police Station ang Kawasaki Baja sidecar ug closed delivery van gikan sa managlahing direksiyon. 

Ang Kawasaki gikan sa dakbayan sa Carcar ug paingon sa Lungsod sa Argao samtang ang closed delivery van gikan sa gikan sa Lungsod sa Argao padulong sa Dakbayan sa Carcar.

Pag-abot sa naasoy nga dapit, ang sidecar nilapas sa iyang lane padung sa lane sa delivery van.  Aksidente kining naigo sa delivery van hinungdan nga nalabay ang mga sakay sa sidecar.

Dali silang gidala sa Deiparine Community Hospital ug Carcar City District Hospital alang sa medical attention. --Decemay P. Padilla/IBM

Papa napatay sa anak

Patay ang usa ka amahan human sila nagsinumbagay sa iyahang anak diha sa Sitio Binalabag, Barangay Lanao, Lungsod sa Dalaguete niadtong Lunes sa gabie, Marso 30, 2026.

Ang amahan nga namatay mao si Ignacio Rubin Amaba, 73, mag-uuma samtang ang suspect mao ang anak niini nga so Renato Carin Amaba, 44, mag-uuma, nga pulos molupyo sa maong dapit.

Sa impormasyon sa Dalaguete Municipal Police Station dunay nakakita sa hitabo.

Pasado alas-10 sa gabii niadtong Lunes, ang asawa sa biktima nga si Veronica Amaba misinggit ug nangayo og pakitabang.

Si Desederia Cisneros nga nagpuyo duol sa balay sa pamilyang Amaba daling nigawas sa ilaha ug gikatahong nakita niya ang suspek nga gisumbag og maayo ang ulo sa biktima sa makadaghang higayon.

Dali siyang niduol ug gipugngan ang suspek apan wala kini mipatuo ug gipadayon sa pagsumbag sa ulo sa amahan.

Nawad-an og panimuot ang biktima ug gidala dayon kini sa Argao District Hospital apan pag-abot didto nakabsan gyud kini sa kinabuhi.

Miangkon matud pa ang suspek sa krimen ug kini miingon nga hubog siya adtong tungora maong nag-away ang duha hangtod nga nisangpot sa sinumbagay.

Kasong parricide ang atubangon sa suspetsado.