Loan moratorium gilantaw sa SSS

CEBU, Philippines — Nagpahibalo ang Social Security System (SSS) nga gilantaw nila ang posibilidad sa pagpatuman og loan moratorium alang sa mga miyembro ug pag-waive sa contribution penalties sa mga employer aron matabangan ang mga pamilyang Pilipino nga naapektohan sa tensiyon sa Middle East ug pagsaka sa presyo sa fuel ug commodities.

Gikataho nga ang state-run pension fund nagkanayon nga gitun-an nila ang posibilidad sa paghatag og relief measures sama sa loan moratorium ug condonation sa employer contribution penalties.

Ang lakang subay kini sa panawagan ni Senador Imee Marcos nga suspendihon ang mandatory government contributions tungod sa padayon nga pagtaas nga presyo sa mga palaliton gumikan sa geopolitical tensions.

Gisugyot ni Marcos nga ang Government Service Insurance System (GSIS), Pag-IBIG Fund, ug Philippine Health Insurance Corporation (PhilHealth) magpatuman og susamang lakang.

Samtang gipasalig sa Department of Trade and Industry (DTI) nga magpabilin nga frozen ang presyo sa basic necessities hangtud sa Abril 16, 2026.

Sa pagkakaron, wala pa’y pinal nga desisyon ang SSS apan nagpadayon ang internal review ug konsultasyon aron masiguro nga ang posibleng mga lakang makahatag og relief sa publiko samtang mapanalipdan ang long-term sustainability sa pundo sa ahensiya. (BANAT NEWS)