Babaye gidunggab patay sa ex
CEBU, Philippines — Patay ang usa ka 39-anyos nga babaye human kini gidunggab sa iyang kanhi kapuyo sa sulod sa diskohan sa Barangay Kalangahan, Lungsod sa Tuburan sa miaging adlaw.
Ang biktima mao si Edwina Malajos Tibas, taga Purok Talisay, Barangay Kalangahan sa maong lungsod.
Ang suspetsado mao si Jay-ar Dichos Lumbab, taga Purok Bateria, Barangay Kalangahan, Tuburan.
Sa imbestigasyon sa Tuburan Municipal Police Station base sa pamahayag sa saksi nga si Riza Piadopo, amiga sa biktima, nag disco sila sa maong barangay tungod sa pista.
Samtang didto sila sa sulod kalit nga niduol sa biktima ang suspek ug diretso kining gidunggab sa makadaghang higayon.
Nahibaw-an sa kapulisan nga niadtong 2022 nag live-in ang duha apan nagbuwag sila pagka May 2025 tungod sa kinaiya sa suspek nga palahubog ug agresibo ug seloso.
Bisan og nagbuwag na ang duha gusto gihapong makigbalik sa biktima ang suspek.
Daling misibat ang suspetsado apan ni-surrender ra sab kini sa otoridad. (BANAT NEWS)
- Latest
