Kawat sa metro sa MCWD nigrabe

CEBU, Philippines —  Nagpahimangno sa mga konsumidor ang Metropolitan Cebu Water District (MCWD) ang taas nga pagsaka sa insidente sa pagpangawat

Nagpahimangno sa mga konsumidor ang Metropolitan Cebu Water District (MCWD) ang taas nga pagsaka sa insidente sa pagpangawat og water meter ilabi na sa mga lungsod sa Liloan ug Consolacion nga maoy nakarekord sa pinakadaghang kaso karong bulan sa Marso.

Sumala sa datos sa MCWD, gikan Marso 1 hangtod 24, 2026, mokabat sa 141 ka insidente ang ilang nalista. Ang Liloan dunay 84 ka kaso, samtang ang Consolacion adunay 39 ka kaso, nga maoy pinakataas sa unang kwarter sa tuig.

Gisundan kini sa Mandaue City nga adunay 10 ka kaso, Cebu City nga adunay lima, ug Lapu-Lapu City nga adunay tulo.

Sa unang mga datos, nakita usab ang padayon nga pagsaka sa kaso sa Liloan. Niadtong Pebrero, adunay 19 ka insidente, diin 11 niini nahitabo sa maong lungsod. Ang ubang lugar nakarekord og mas ubos nga kaso sama sa Lapu-Lapu City (2), Mandaue City (2), Talisay City (2), ug usa ka kaso matag usa sa Cebu City ug Consolacion.

Sa Enero, 12 ka kaso ang nadokumento sa MCWD, diin ang Cebu City adunay pinakadaghan nga siyam ka insidente, gisundan sa Lapu-Lapu City nga adunay duha, ug Liloan nga adunay usa.

Tungod sa pagdagsang sa kaso, nanawagan ang MCWD sa Philippine National Police (PNP) nga palig-onon ang presensya sa kapulisan ug tabangan ang ahensya sa pagsubay sa mga responsable sa pagpangawat og water meter ug sa ilegal nga pagpamaligya niini.

Aron masuportahan ang operasyon batok sa mga suspek, nagpadayon ang MCWD sa paghatag og pabuya nga P25,000 alang sa bisan kinsa nga makahatag og impormasyon nga mosangpot sa pagdakop sa mga mamalitay og kinawat nga water meter, ug P10,000 alang sa impormasyon nga mosangpot sa pagdakop sa mga kawatan.

Gipasabot usab sa MCWD nga kasuhan ang mga indibidwal nga mapamatud-ang namalit og kinawat nga water meter ubos sa Anti-Fencing Law of 1979.

Gipasidaan sa ahensya nga ang pagpangawat og water meter mosangpot sa dayong pagputol sa serbisyo sa tubig ug mahimong magdala og risgo sa kahimsog, tungod kay ang mga linya sa tubig mahimong ma-expose ug posibleng ma-contaminate kung matangtang ang metro.

Gidasig sa MCWD ang publiko nga magmatngon ug dayong motaho sa bisan unsang kahina-hinalang kalihokan pinaagi sa ilang opisyal nga komunikasyon nga mga channel.

Gitambagan ang mga apektadong konsumidor nga magkuha og police report nga naglakip sa ilang Account Code, ngalan sa rehistradong customer, ug serial number sa metro, sa dili pa moduol sa MCWD One-Stop Shop aron mangayo og kapuli nga metro. (BANAT NEWS)