2, 238 ka benepisyaryo sa 4ps nigradwar na

CEBU, Philippines —  Kapin 2,238 ka benepisyaryo sa Pantawid Pamilyang Pilipino Program (4Ps) ang pormal nga nakagradwar sa “Saulog 4Ps Graduation Ceremony” nga gipahigayon niadtong Marso 28, 2026 sa Cebu City Sports Institute.

Mokabat sa 700 ka benepisyaryo ang personal nga mitambong sa seremonya, diin giila ang ilang paningkamot sa pagpadayon sa edukasyon sa ilang mga anak, pag-atiman sa panglawas, ug pag-apil sa mga Family Development         Sessions.

Mitambong usab ang mga opisyal sa gobyerno, lakip si Cebu City Mayor Nestor Archival, Regional Director Shalaine Marie Lucero sa DSWD FO VII ug Cebu City Councilor Francis Esparis, kauban ang ubang representante sa lokal nga kagamhanan.

Gidasig ni Archival ang mga gradwado nga ipadayon ang mga nakat-unan sa edukasyon, panglawas, ug responsableng pagginikanan bisan human sa ilang partisipasyon sa programa.

Ang graduation ceremony usa ka simbolikong timaan nga ang mga benepisyaryo mihuman sa ilang partisipasyon sa programa base sa assessment sa Department of Social Welfare and Development (DSWD).

Gisiguro sa mga opisyal nga magpadayon ang suporta sa gobyerno pinaagi sa ubang programa ug serbisyo nga makatabang sa ilang panginabuhi.

Ang Pantawid Pamilyang Pilipino Program (4Ps) usa ka conditional cash transfer program sa Department of Social Welfare and Development nga nagtumong sa pagpakunhod sa kakabos pinaagi sa pagpalambo sa edukasyon ug panglawas sa mga kabataan.

Ubos sa programa, ang mga benepisyaryo kinahanglan motuman sa pipila ka kondisyon sama sa regular nga pag-eskwela sa mga bata, pagpa-checkup ug pagpa immunize, ug pag-apil sa Family Development Sessions.

Ang “graduation” nagpasabot nga nahuman na nila ang ilang partisipasyon sa programa base sa evaluation sa DSWD.