Namusil kay gi-bully, usa patay

CEBU, Philippines — Usa patay samtang usa ang kritikal karon sa tambalanan human sa nahitabong pagpamusil sa Sitio San Antonio, Barangay Calamba, siyudad bsa Sugbo kagahapon sa buntag, Biyernes, Marso 27, 2026.

Ang namatay mao si Vicente Gemuta, 42, taga Sitio San Antonio, Barant Calamba.  Samtang talandugon ang kahimtang ng Renato Belanizo alyas Atoy, 52,  residente sab sa maong dapit.

Ang suspetsado mao si Joel Orocay Rentuma, 48, gwardiya sa usa ka towing services ug taga Sitio Arca, Barangay Punta Prinsesa, Cebu City.

Sa impormasyon sa kapulisan sa Sawang Calero Police Station 6 ang mga biktima naglingkod ra daplin sa karsada nagduwa og cellphone.

Samtang ang suspect naka duty sa gitrabahoan niini nga towing services atbang ra sa nahimutangan sa mga biktima.

Gikatahong nilabang ang suspek ug giduol ang mga biktima ug diretso silang gipamusil nga parehong naigo sa ulo ug nagkadaiyang parte sa lawas.

Pag-abot sa kapulisan sa dapit nadala na ang mga biktima sa Cebu City Medical Center.

Nihimo dayon og follow up operation ang kapulisan ug nadakpan nila ang suspetsado diha sa iyaha ra usab nga gitrabahoan.

Sa impormasyon nga gibutyag sa kapulisan,  mialegar ang suspetsado nga siya gi-bully sa mga suspetsado.

Ang mga biktima mangatawa matag mopasiplat niya ug huna-huna sa suspetsado nga siya maoy gikataw-an.

Nasayran sab ang suspect napriso niadtong 2011 sa kasong homicide ug nakagawas niadtong 2021.

Na-recover sa kapulisan ang kalibre .38 nga armas nga gigamit sa suspek sa pagpusil sa mga biktima ingon man ang usa ka bala ug upat ka mga kabhang.

Kasong murder ang ipasaka batok sa suspetsado nga karon nagtingkagol sa Sawang Calero Police Station. IBM  BANAT NEWS