Task group giumol batok sa drug trafficking

CEBU, Philippines — Ang Probinsiya sa Sugbo uban ang nagkadaiyang ahensiya sa gobiyerno ang niumol og task group alang sa hiniusa ug gihingusgan nga koordinasyon alang sa hugot nga siguridad sa mga pantalan o entry points sa probinsiya batok sa drug trafficking.

Niabot ngadto 13 ka regional heads sa nagkadaiyang national line agencies ang uban kang Baricuatro sa usa ka tigom alang sa tinguha nga mahimong epektibo ang synchronize anti-illegal drug efforts ug mahan-ay ang operasyon niini.

Si Baricuatro maoy representante sa Probinsiya sa Sugbo sa pagpirma sa memorandum of agreement paghimo sa Cebu Seaport Inter-Agency Drug Interdiction Task Group (CEBU SIADITG).

Ubos sa moang kasabotan, ang member agencies ni-commit nga hingusgan ang joint operations ug koordinasyon sa kampaniya batok sa ilegal nga drugas diin hiniusa ang ilang operasyon sa tanang pantalan lakip na ang mga pribadong pantalan.

Ang Philippine Drug Enforcement Agency (PDEA)-7 maoy lead agency sa task group ug suportado sa Department of Justice (DOJ)-7, Police Regional Office (PRO)-7, Bureau of Customs (BOC)-7, National Bureau of Investigation (NBI)-7, Cebu Port Authority (CPA), PCG-7, PNP Maritime Group-7, Naval Forces Central, Maritime Industry Authority (MARINA)-7, National Intelligence Coordinating Agency (NICA)-7, Bureau of Fisheries and Aquatic Resources (BFAR)-7, ug PNP Drug Enforcement Group.

Ang Kapitolyo maoy mohatag og administrative support lakip na ang logistical, financial ug material support ug ingon man ang maintenance sa mga ekipo ug pasilidad pinaagi sa Provincial Anti-Drug Abuse Office (PADAO).  BDB BANAT NEWS