P100 usbaw sa suholan gipangayo  

CEBU, Philippines — Koalisyon sa 18 ka labor organizations sa Central Visayas pormal nga niduso og petisyon kagahapong adlawa alang sa P100 nga usbaw sa inadlaw nga suholan sa tanang mamumuo aron maprotektahan ang sektor sa pamuo gikan sa epekto sa pagsaka sa global oil prices ug padayon nga inflation.

Ang petisyon gisumite ngadto sa Regional Tripartite Wages and Productivity Board-7 nga gipangulohan sa Partidong Manggagawa (PM) ug Sentro ng mga Nagkakaisa at Progresibong Manggagawa (SENTRO), kauban ang 16 pa ka labor groups.

“Our workers are struggling to cope with the rising prices of food, transportation, and basic utilities. The current wage levels are no longer enough to meet even the minimum requirements for a decent standard of living. We are calling for an emergency wage adjustment of P100 per day to help families survive this economic crisis,” matud pa ni Dennis Derige, PM Regional Coordinator.

Nagtapok ang koalisyon sa gawas sa opisina sa DOLE-7, nagbitbit og mga banner, flag, ug handwritten placards nga nag-awhag sa gobyerno sa paglihok. Ang 18 ka labor groups nagrepresentar sa lain-laing sektor sa Central Visayas, lakip ang manufacturing, logistics, mining, food delivery, ug uban pa.

Sumala pa nila kining krisis sa Middle East ug ang pagsaka sa global oil prices igo na nga rason aron mohatag og emergency wage adjustment bisan wala pa sa regular nga schedule sa review.

Matud pa sa mga petitioner nga ang pagsaka sa presyo sa lana nagdugang sa gasto sa transportasyon, kuryente, ug produksyon, nga misangpot sa pagsaka sa presyo sa  batakang mga produkto sa rehiyon.

Ang rehiyon nakarecord og pinakataas nga inflation rate sa Pilipinas, mga sais porsiyento.

Si Atty. Roy Buenafe, miingon nga ang sitwasyon karon dili ordinaryo.

Gihangyo sa labor coalition ang RTWPB-7 nga aprobahan ang P100 emergency wage increase sa tanang sektor sa rehiyon kay kinahanglang mabalik ang purchasing power sa kwarta sa mga tawo.   IBM BANAT NEWS