PISTON-Cebu nangangkon nga malampuson ilang strike  

CEBU, Philippines — Ang transport strike nga gihimo sa PISTON-Cebu niadtong Biyernes nakahasol sa mga sumasakay sa Metro Cebu. Matud pa sa grupo 75 hangtod 80 porsyento nga naparalisar ang transportasyon sa mga rota.

 “Successful ang nahitabo nga transport strike. Naabot nato ang 75 to 80 percent paralysis sa pipila ka mga rota,” pangangkon pang Greg Perez, chairman sa PISTON-Cebu, sa usa ka interbyu.

Apektado sa strike ang dagkong rota sama sa Osmeña Boulevard paingon sa Talamban ug ubang kasikbit nga distrito, diin klaro ang pagkunhod sa operasyon sa transportasyon. 

“Actually, gi-lift na namo pag udto pero naa pay pipila ka lugar nga naapektuhan gihapon tungod sa partisipasyon sa ubang grupo,” dugang pa ni Perez.

Ang ilang protesta kabahin sa nationwide transport strike, nga miabot sa ikaduhang adlaw, diin ang mga drayber nagpadayon sa pag-awhag sa gobyerno sa paglihok batok sa pagsaka sa presyo sa lana.

Miapil lamang ang PISTON-Cebu sa ikaduhang adlaw na sa strike.

Gipasidaan ni Perez nga kritikal gihapon ang kahimtang sa transport sector karon kay daghang drayber ang hapit wala nay kita human kuhai sa operational expenses ang ilang kita maong naglisod na sila suportahan ang ilang pamilya.

“Dili na gyud makaya sa ubang driver ang ilang adlaw-adlaw nga gastohan. Ang uban, mas pilion na lang mohunong kaysa magpadayon nga halos wala nay kita,” dugang pa ni Perez.

Nagbitbit ang mga protesta og mga banner nga nag-awhag sa rollback sa presyo sa lana, pagtangtang sa VAT ug excise tax sa fuel, P5 nga increase sa pasahe, P1,200 nga national minimum wage, pag-abolish sa Oil Deregulation Law, ug nationalization sa oil industry.

Para ni Perez, ang kalampusan sa strike dili lang makita sa pagpasundayag sa kalisod sa mga drayber, apan usab sa pagpangayo sa gobyerno og dali nga aksyon.

“Drivers are losing income, struggling to survive, and calling for urgent action,” matud pang Perez.

Sa laing bahin, gihulagway sa Cebu City Police Office(CCPO) nga hapsay ug malinawon ang gihimong rally kagahapon dinhi sa siyudad sa Sugbo.

Nasayran nga unom ka dapit nagtapok ang mga nagprotesta sugod alas 8 sa buntag.  Natapos ang ilang programa pasado alas 3 sa hapon.

Wala hinooy nadawat nga report ang kapulisan nga dunay bati nga panghitabo subay sa maong kalihukan.

Atol ning pagsulat sa balita, wala pay opisyales sa dakbayan ug sa kapolisan ang nikompirmar sa pangangkon sa nagprotesta sa gilapdon sa pagka-paralisar sa transportasyon sa Metro Cebu kagahapon. IBM BANAT NEWS