Ni-overtake, nalatayan patay

CEBU, Philippines — Patay ang driver sa usa ka motorsiklo human nalatayan og wing van sa National Highway, Barangay Panalipan, Lungsod sa Catmon kagahapon sa kadlawon, Huwebes, Marso 26, 2026.

Ang biktima mao si Paulino Collantes Taneo, taga Barangay Poblacion, Lungsod sa Borbon.  Samtang ang driver sa wing van mao si Renaldo Abad Ondong, 45, taga Sitio Katap, Barangay Balao, Lungsod sa Barili.

Base sa imbestigasyon sa kapulisan sa Lungsod sa Catmon, ang motorsiklo ug wing van nagbiyahe sa managlahi nga direksiyon.

Giingong ang motorsiklo ni-overtake og laing sakyanan ug nilapas kini sa iyang lane ug napadulong sa lane sa wing van.

Aksidente matud pa nga natapsingan ang motor ug napasok sa ilawom sa wing van ang driver sa motorsiklo hinungdan nga nalatayan kini sa ligid nga nakaingon sa grabeng pagkaangol niini.

Ang biktima gidala sa Sogod District Hospital sa Barangay Damolog, Lungsod sa Sogod apan gideklarar kini nga dead-on-arrival samtang ang driver sa wing van gidala sa police station.  IBM BANAT NEWS