Puya gikaon sa iro

CEBU, Philippines — Puya nga gituohang gilabay sa basakan nadiskubrehan human gikaon sa iro niadtong Miyerkules sa buntag, Marso 25, 2026 diha sa Purok 6 Gabajan, Barangay La Union, Lungsod sa Candijay, Probinsiya sa Bohol.

Sa impormasyon sa kapulisan sa Candijay Municipal Police Station usa ka Barangay Health Worker nga si Bernadeth Duba, 47, residente sa maong lugar maoy nakakita sa maong puya.

Matud pa nga sayo sa buntag kauban ang bana niini  niadto silang duha sa basakan aron ibalhin og tugwayanan ang ilang binuhing baka.

Kuyog niadto adtong tungora ang ilahang iro, apan natingala sila nga daw duna kini gikaon didto sa basakan.

Ang iyang bana niduol ug gisusi kung unsay gikaon niini, nakurat nalang siya kay porma og tiil bata ang gikaon sa ilang iro.

Dali nila ning gibadlong ug nangayo sila og tabang sa ubang mga mag-uuma didto aron siguraduhon kun puya ba gyud ang ilang nakit-ang gikaon sa iro, tuod man usa kini ka puya nga babaye nga gituohang bag-ohay palang gyud gipakatawo ug gidudahang gilabay sa maong lugar.

Nitawag dayun sila sa mga otoridad ug gikuha ang puya. Sa paghiling sa doktor gituohan nga niadtong Marso 24 pa kini gipanganak ug gilabay kini sa basakan kadlawon sa Marso 25.

Nasayran nga maong bahin sa basakan mingaw ug layo sa mga kabalayan.

Nakig-alayon karon ang Candijay Municipal Police Station sa mga Barangay Kapitan ingon man BHW aron masubay ang record sa ilang barangay kun kinsay mga mabdos o manganakay karong buwana kini aron mahibaw-an gyud kinsay naglabay sa puya. IBM BANAT NEWS