Kapitolyo dili na magbutang og satellite terminal

CEBU, Philippines — Ang manager sa mga terminal sa Kapitolyo Ahmed Cuizon nipadayag nga wala na sila magplano sa satellite terminal tungod kay ilang nabantayan nga bisan og nahimo kining epektibo niatong Kalag-Kalag apan sa pasko direkta gihapon ang mga pasahero nga moadto sa Cebu South Bus Terminal (CSBT) ug Cebu North Bus Terminal (CNBT).

Ug tungod niini ang Kapitolyo nag-andam sa pagdagsa sa mga pasahero diha sa mga terminal.

Gibtuyag ni Cuizon nga dugang personnel ang i-deploy aron mag-assist sa mga pasahero, adunay standby nga medical team ug ambulansiya ug nanghatag usab og libreng tubig ngadto sa mga pasahero. 

Ang CSBT butangan usab og dugang airconditioning units aron hamugaway ang paghulat sa mga bus.

Nunot niini, ang Kapitolyo mopahigayon og libreng sakay alang sa mga pasahero hilabina sa vulnerable sector sama sa mga tigulang, mabdos, person with disability, ug kadtong adunay mga bata nga dala.

Gikataho nga tag-upat ka bus ang Cebu North Bus Terminal ug Cebu South Bus Terminal alang niini ug adunay dugang units ang i-deploy kon kinahanglan.

Samtang ang lokal nga kagamhanan sa Lungsod sa Cordova maghatag og libreng gasolina sa mga residente sa lungsod nga nagtrabaho ug adunay single nga motorsiklo.

Ang LGU nipahibalo nga libreng tobil ang ihatag niini karong Marso 28, 2026 gikan sa alas 6:00 sa buntag hagntud sa alas 11:00 sa buntag ngadto sa Shell Gasoline Station sa Barangay San Miguel, Lungsod sa Cordova.

Ang unang 800 ka Cordovahanon ang mahatagan pinaagi sa first come, first serve nga basehan.

Ang gustong mo-avail magdala lang og valid ID pagpamatuod nga residente sa Cordova ug ingon man company ID nga nagpamatuod nga usa kini ka trabahante sulod o gawas sa lungsod.

Sa laing bahin, nisaad ang opisyales gikan sa nagkadaiyang ahensiya sa gobiyerno ug mga highly urbanized cities sa Sugbo nga palig-onon ang kaluwasan sa kadalanan atol sa Semana Santa pinaagi sa usa ka pledge of commitment nga gipirmahan niadtong Miyerkules, Marso 25, 2026 aron maprotektahan ang mga biyahero ug mapugngan ang aksidente sa dalan.

Gipangulohan ni Atty. Wendel Dinglasan, direktor sa Land Transportation Office-7 ang oath-taking ug pagpirma sa kasabotan nga nagtumong sa patas nga pagpatuman sa balaod sa trapiko, pagtabang sa publiko, ug pagpalambo sa disiplina sa kadalanan atol sa pagdagsa sa biyahero sa Semana Santa. Shiela Mae H. Agrabio, BDB BANAT NEWS