Magbuot-buot og pasaka sa plete silotan – LTFRB

CEBU, Philippines — Ang Land Transportation Franchising Regulatory Board-7 nibahad sa mga public transport nga mopataas og plete pinaagi sa pagbuot-buot sa fare matrix mag-atubang og silot.

Kini ang gibutyag ni LTFRB-7 Director Abosamen Matuan nga nahinabi sa mga tigbalita.

Matud ni Matuan nga ang ilang buhatan walay gipagawas nga fare matrix human gipugngan ni Presidente Ferdinand "Bongbong" Marcos,Jr ang pagpasaka sa pletehan.

Si Matuan nipasidaan nga kadtong mga nagbuot-buot pagpahimutang og fare matrix nga nagpasaka sa ilang pletehan mag-atubang kini og kaso sa ilang kalapasan nga nahimo.

Gibutyag ni Matuan nga mopahigayon sila og pakisusi human sa nadawat nilang taho nga adunay sakyanan nga pasaheroan ang giingong nagpasaka na sa plete ug nagpahimutang og fare matrix.

Ang pangulo sa LTFRB-7 niawhag sa katawhan nga motaho diha sa ilang buhatan ilakip ang plate number sa mga sakyanan nga nagpasaka ug pletehan.

Sa laing bahin, ang transport group nga PISTON-Cebu magpahigayon og transport strike karong adlawa, Marso 27, 2026, sugod sa alas 5:00 sa buntag hangtud sa alas 3:00 sa hapon diin ang mga drayber mobalik sa kadalanan aron ipadayag ang ilang protesta batok sa pagsaka sa presyo sa lana, panawagan sa pagbasura sa oil deregulation law, ug pagduso sa pagsaka sa plete sa jeepney.

Ang welga pangulohan ni PISTON-Cebu President Greg Perez diin padayon nila nga ipadayag ang dugay na nilang mga panawagan alang sa fare hike ug rollback sa presyo sa lana nga ilang giingong padayon nga nagbug-at sa mga drayber ug operator.

Matud ni Perez nga daghang drayber ang naglisod matag adlaw ug naglisod sa pagpadagan sa ilang mga yunit samtang ang ilang kita dili na igo aron masuportahan ang ilang pamilya tungod sa padayon nga pagsaka sa presyo sa krudo.

Gilaoman usab nga makakuha og suporta ang kalihokan gikan sa allied organizations ug lain-laing sektor uban sa mga pakigpulong gikan sa mga representante sa PISTON-Cebu, Urban 4, Bayan Muna, party-list groups, uban pa’ng sektor, ug kabatan-onan.

Apan daghang transport group ang nipili nga dili moapil sa welga kinsa ang taxi operators, bus operators, ug modernized jeepney operators mikompirma nga dili sila moapil sa maong kalihokan.

Si Richard Cabucos, presidente sa United Cebu Taxi Operators Association nagkanayon nga wala sa ilang plano ang pag-apil sa welga sa karon.

Si Julieto Flores, chairman sa Cebu Provincial Operators Transport Cooperative nibalibad usab sa pag-apil ug nagkanayon nga ilang isalig sa gobiyerno ang ilang mga kabalaka.

Samtang si Ellen Maghanoy, presidente sa Cebu Federation of Transport Cooperatives nipadayag nga walay modernized jeepney operators ubos sa ilang grupo ang moapil sa welga.

Ang Visayas chapter sa National Confederation of Transportworkers Union (NCTU) mipahibalo usab nga dili sila moapil sa welga nga gipasiugdahan sa PISTON-Cebu. Ang NCTU-Visayas gilangkuban kini sa lain-laing transport groups lakip na ang mga drayber sa modern ug traditional jeepney. Mitchelle L. Palaubsanon ug Chain Lee Templo, CTU-Tuburan intern, BDB BANAT NEWS