CERA: Plano sa MCWD nga groundwater extraction delikado

CEBU, Philippines — Ang Cebu Electricity Reform Advocates (CERA) nipasidaan nga ang plano sa Metropolitan Cebu Water District (MCWD) nga mobalik sa groundwater extraction usa ka delikado nga pagbag-o.

Samtang ang MCWD nitubag pinaagi sa pagdapit og diyalogo ug nagpasalig nga ang groundwater kabahin lang sa usa ka mas lapad ug science-based nga water strategy.

Gisaway sa CERA ang desisyon sa MCWD nga magkomisyon og dugang deep wells aron madugangan ang supply ug makamenos sa gasto nga ilang giingong naghatag og prayoridad sa short-term nga solusyon imbes long-term sustainability.

Gipasabot sa CERA nga ang groundwater sa mga isla sama sa Cebu usa ka finite freshwater lens nga naglutaw ibabaw sa mas bug-at nga saltwater hinungdan nga dali kining maapektohan sa sobrang pagkuha.

Ilang gikutlo ang dugay nang mga pagtuon sa University of San Carlos’ Water Resources Center (WRC) nga nagdokumento sa epekto sa sobra nga groundwater extraction.

Matud sa CERA nga samtang nagsalig gihapon ang Metro Cebu sa groundwater, ang ubang dagkong siyudad sa nasud nibalhin na ngadto sa mas sustainable nga mga solusyon sama sa surface water systems ug bulk supply projects. Nanawagan ang CERA og usa ka integrated approach sa water ug energy security. Samtang giila sa MCWD ubos sa liderato ni Chairman Ruben Almendras ug General Manager Atty. John Dx Lapid ang mga kabalaka nga gipadayag sa CERA ug gipasiugdahan ang mahinungdanong kolaborasyon.

Gidapit sa water district ang CERA alang sa usa ka direkta ug mas lawom nga diskusiyon aron mapatin-aw ang ilang mga plano ug estratehiya.

Dugang sa MCWD nga ang komplikado nga mga isyu sa water management mas angay hisgotan pinaagi sa direkta nga engagement kaysa pinaagi sa media.  BDB BANAT NEWS