Balikbayan boxes nahatag na

CEBU, Philippines — Ang Department of Finance (DOF) ug ang Bureau of Customs (BOC) mipagawas na sa mga abandonadong balikbayan boxes nga gibiyaan sa cargo handlers sa Ports of Manila ug Davao.

Mokabat sa 25,818 ka kahon ang nahatud na ngadto sa mga pamilya sa overseas Filipino workers (OFWs) sa tibuok nasud hangtod Marso 23, 2026.

Gipadala kini subay sa direktiba ni Presidente Ferdinand R. Marcos Jr. nga ipahatag na tanang balikbayan boxes nga gipamiyaan sa freight forwarders sa nagkalain-laing pantalan sa nasud.

“Patuloy ang Bureau of Customs at ang Department of Finance, kasama ang Department of Migrant Workers [DMW], sa pagtulong para maibalik ang mga abandoned boxes sa mga pamilya,” matud ni Finance Secretary Frederick D. Go atol sa distribusyon sa balikbayan boxes sa Port of Cebu niadtong Marso 24, 2026.

Matud pa ni Go gusto sa presidente nga tanang balikbayan boxes maabot gyud sa mga tag-iya, ug kinahanglang papanubagon ang mga freight forwarders sa ilang pagpabaya sa pagbayad sa mga buhis nga ilang gilikayan. Si Customs Commissioner Ariel F. Nepomuceno miingon nga ilaha karong gipaspasan ang pag deliver sa nahibilin pang mga shipments.

Sumala ni Nepomuceno, mopokus karon ang BOC sa Manila International Container Port (MICP) ug Port of Cebu aron mahuman ang tanang nahibilin nga delivery.

Base sa datos, mokabat sa 13,842 ka kahon ang na-release sa Cebu, 8,475 sa MICP, 2,699 sa Subic, 732 sa Davao, ug 70 sa Port of Manila. Adunay pa’y 15,084 ka balikbayan boxes nga naka-iskedyul nga i-release ug kadaghanan niini gikan sa MICP nga adunay 14,487, samtang 498 ang nahibilin sa Cebu. Kagahapong adlawa, 30 ka balikbayan boxes ang na turnover na sa tagsa tagsa ka mga consignees.

Si Leslie D. Lim, chief executive officer sa L98 Brokerage, miingon sa laing interbyu nga ang ilang kompanya mitabang sa distribusyon sa 8,707 gikan sa 13,842 ka balikbayan boxes  para sa mga pamilya sa OFWs nga taga Cebu.

Gipasabot ni Lim nga ang mga kalangay tungod ni sa kadaghan sa mga nangapil nga consolidators imbes nga usa ra ka forwarder.

Ang Department of Finance maoy nipagawas og pundo nga P330 milyones aron bayran ang buhis para sa tanang balikbayan boxes nga gidaganan sa mga forwarders subay sa mando ni Marcos aron mahatag na kini sa mga pamilya sa OFWs.

Si Go ug Nepomuceno mismo nangulo sa turnover sa kataposang mga balikbayan boxes nga natanggong sa pantalan sa Cebu.

Personal kining gidawat 30 ka OFWs ug ilang mga pamilya kay dugay na kaayo nilang gihulat ang maong mga gipadala.

Gipadayag sa mga benepisyaryo ang ilang kalipay ug kahupayan sa dihang nadawat na nila ang ilang mga kahon.

Giawhag ni Go ang publiko nga magmatngon ug makigtransaksyon lamang sa lehitimo ug accredited nga mga forwarding companies aron malikayan ang susamang problema sa umaabot.

Ang DOF ug BOC inabagan sa National Bureau of Investigation mopasaka og kasong estafa ug cyberlibel sa sunod semana sa 11 ka forwarders sa Pilipinas nga maoy hinungdan sa pagka-abandonar sa mga balikbayan boxes. Mipasalig ang gobyerno nga ipadayon ang ilang paningkamot hangtod nga ang tanang nahibilin nga balikbayan boxes mahatod na ngadto sa ilang hustong mga tag-iya. Rowena Capistrano, IBM BANAT NEWS